September 23 aṭangin Aizawlah GoAir

GoAir chuan Sep­tember 23, 2019 aṭangin Aizawl (Lengpui Airport)-ah service ṭan an tum nia thu dawn a ni. An tum anga an thlawk thei a nih chuan, airline zinga Mizorama service pariatna an ni ang.

GoAir senior exe­cutive network planning Neha Shukla-in Mizo­ram sorkara GAD Aviation Wing Principal Consultant hnena August 16, 2019-a lehkha a thawn danin, GoAir chu kumin September 23 aṭangin Lengpui Airport-ah a service ṭan dawn a, thlawhna (aircraft) pawh Airbus-320 thlawhtir tum a nih thu leh Guwahati tlawh ṭhin a nih tur thu tarlan a ni.

GoAir-in an ruahman dan chuan, September 23 aṭanga thla khat chhung, October 26, 2019 thleng hman turin hetiang hian thlawh hun siam a ni. Zing dar 5-ah Kolkata aṭanga chhuakin, zing dar 6-ah Guwahati a thleng ang a, Guwahati aṭangin zing dar 6:50-ah Mizoram a pan ang a, zing dar 7:50-ah Lengpui Airport-ah a ṭum ang.

Zing dar 8:40-ah Lengpui Airport aṭanga thlawk chhuakin, Guwahati a pan ang a, zing dar 9:30-ah  Guwahati a thleng dawn a; chawhma dar 10:30-ah Guwahati aṭanga thlawk chhuakin, chhun dar 11:30-ah Kolkata-ah a 

ṭum ṭhin ang. Thlawhna thlawh hun hi October 26, 2019 hnu lamah chuan thlasik chhung atan tihdanglam tum a ni.

Zing lama an thlawh chhan tur tarlangin, aircraft ngai hmangin chawhnu leh zan lamah hmun danga thlawh a ngaih dawn vang a nih thu an tarlang.

Lengpui Airport-ah hian airlines pasarih an service tawh a, GoAir hi an service a nih chuan airline service pariatna a ni ang. Indian Airlines service hmasa berin, Airport hawn a nih tirh aṭangin an thlâwk ṭan nghal a; a hnu kum 2004-2006 velah Air Deccan a service a, Air Deccan service ṭan hnu deuhah Kingfisher Airlines a thlâwk ṭan ve leh a, kum 2012-a an tlakchhiat khan Mizorama an service pawh an titâwp a ni.

Kum 2015-2017 chhung vel Lengpui Airport-ah Spice Jet an service ve leh a; hun rei thawkhat tak service tawh Jet Airways pawh an tlakchhiat avangin February 10, 2019 aṭangin Mizorama an ser­vice an titawp. Lengpui Airport-a service hmasa ber Indian Airlines chu kum 2011-ah Air India nen inzawm a, Air India tih hming put chhunzawmtir a nih avangin kum 2011 aṭangin Air India angin an service ṭan.

Kum 2009 kum tâwp lam aṭang khan passenger pakua chauh chuan theihna Cessna Caravan North East Shuttle (VT-NES) chu a service bawk a; mahse, May 4, 2011-ah Lengpui Airport-a a ṭum tur a chetsual hnuah a service chhunzawm tawh lo nia thu dawn a ni.