Maintenance of Household Register Act Governor-ah a la táng - Deputy Speaker

Mizoram Assembly deputy speaker Lalrin­awma chuan nimin khan MNF pisa, Mizo Hnam Rûnah thu sawiin, MNF ministry-a Mizoram Assembly-in bill a pass tawh 18 zinga pakhat, The Mizoram Maintenance of Household Register Act 2019' chu Governor-ah a la táng mek tih a sawi.

MNF sorkarah 'Sem sem dam dam, ei bil thi thi' tih chu an thupui ni se a duh thu sawiin Lalrinawma chuan, "Pathianin sorkarna min pe a, mipui pawhin beisei nei takin min thlir. Mahni hamṭhatna tur chauha bei loin, ram leh hnam tan i thawk ang u. Party inlungrualna leh ṭanhona hian mipui tana sorkar ṭha a siam thei a, sorkar ṭha siam turin kan vaiin mawhphurhna kan nei a, mimal tin kan pawimawh a ni," a ti.

Deputy Speaker chuan, Mizo hnam pasalṭha leh hnam tana martarte beihna leh inpeknate chu hre reng tura chahin, "Hnam nihna thinlung mei­chher an lo dêt tawh kha i chhi nung reng ang u. Mizo nationalism-ah chuan ram, hnam, khawtlang mipui himna leh hmangaihna laimû a awm a ni," a ti a; tih tak takna nena ram rawng an bâwl phawt chuan, Pathianin ram rawng­bawlna hna an kutah a dah reng tur thu a sawi.