Duhoma'n ZNP ṭhiah a nih tawh thu a puang

ZPM chuan nimin khan an pisaah chhung inkhawm an hmang a, an president Lalliansawta chuan mipuite beisei ram din turin ṭan lak a ṭul thu a sawi. Thusawitu dang ZNP president Lalduhoma, MLA chuan an party 

ṭhiatin, ZPM-ah an in chhunluh tawh thu a puang.

Lalliansawta chuan, ZPM chu pawl hrang hrang inchhûng khawm an nih avangin ngaih pawimawh zawng leh ṭan lak thiam dan a inan loh tur thu sawiin, "Inrem taka luang hoin, mipui beisei ram din turin ṭan lak a ṭul. Zoram tlu chhe mek tung ding tura inhlâwm khawm kan nih theihnghilh lo ila, kan inhlâwm khawm ṭhat chuan Pathianin mal min sawm ang," a ti.

Mizo mipui zingah mi tam tak beidawnga an awm mek thu sawiin ZPM President chuan, "Beiseina tlemtê chu mipuite thinlungah a awm. Chu beiseina tlemtê chu a tinung zualtu nih tumin theihtawp i chhuah ang u," a ti a; mipui beisei tihlawhtling turin dinhmun ṭha taka an din thu a sawi.

ZPM President chuan, MPC party chu ṭhiah la ni chiah lo mah se, tam takin ZPM an zawm tawh thu a sawi a, "MPC-a tlem azawng la awmte pawh mipui hruai kâwi thei zawng sawi loa thawhpuiah kan sâwm a ni. Ṭha taka thawkhoin, MLA pasarih kan sual chhuak a, MPC-te hi kan la ngai hrang lo. A remchan hun hunah ZPM min zawm se kan duh," a ti.

Thusawitu dang Lalduhoma chuan, kum 1986 khan Mizoramah remna leh muanna a thlen theih nana beihpui thlak turin hruaitu leh member ṭhahnem takin Congress chhuahsanin Mizo National Union (MNU) an din thu sawiin, "Tuna ZNP-a member ṭhahnem tak MNU kal zel leh kum 33 chhung lai inphatsan loa inzui kan nih avangin sawi hmaih chi niin ka hre lo," a ti a; kum 1989-ah PC party leh MNU ṭhiatin, MNF leh neutral aṭanga kalte nen Brig. T Sailo president-na hnuaiah Democratic Party an din thu a sawi. 

Democratic Party chu kum khat hnuah a keh darh thu sawiin Lalduh­oma chuan, "PC ho kha chuan Mizoram Janata Dal (MJD) an din a, keini MNU-ho erawh chu 1990 khan MNF-ah kan lut ta thung a ni," a ti. Lalduhoma sawi danin, MNF chu Zoramthanga kaihhruaina hnuaiah kum sarih an awm a; party inthlan a awm a, amah chu president atan MNF official candidate atan thlan tlin ni mah se, dik lo taka inthlan tihbuai a nih avangin MNF chu unit aṭanga headquarter thlengin intia tâwk takin a phel. MNF mite leh MNU kal zelte'n MNF (Nationalist) party an din a, MNF-N chu Election Commission of India-in December 12, 1997-ah political party-ah pawm­in, January 28, 1999-ah election symbol atan ní (sun) pek a ni.

MNF-N chu June 29, 2000-ah Zoram Nationalist Party (ZNP) tia thlak a ni a, chu chu September 19, 2000-ah ECI-in a pawmpui a, tun thlengin ZNP tih hming an pu ta a ni. Term hnih chhung MLA pahnih ve ve an nei ve tawh a, unit 730 vel leh block 52 leh district pahnih an nei.

Lalduhoma chuan, ZNP hming, party flag, symbol leh hlate chu an mangṭha dawn ta tih sawiin, "Recognised party-ah chuan Pu Denga leh Pu Ṭhena te nen hian founder president kan ni a, founder president tan ngat phei hi chuan, mahni party din han nuaibo hi chu a har a, hnukte pawh a ulh thei hial a ni," a ti.