KHAWTHLIR

Higher & Technical Education department chuan thuchhuah siamin, Zoram Medical College-ah Mizoramin MBBS quota a neih seat pakua a la âwl thu leh central pool-a Mizoram­in BDS seat panga a neihte chu a la âwl thu an tarlang. Seat la âwlte chu NEET 2019 paltlangte tan August 21, Nilaini chawhnu dar 2 thleng HTE Technical Wing office, Chaltlang-ah dil theih a ni.

MPC party chuan thu­chhuah siamin, Chaltlang, Chhinga Veng leh Kanan Venga local council by-election neih turah candidate an siam dawn lo tih an tarlang a, an party mite chu an khawtlang tana ṭha tura an ngaih vote mai turin an chah. MPC hian veng pathuma khawtlang hmasawnna atana hna thawk tura thlan tlin local council member mi pathumte an term hmang zo hman loa an thi chu pawi an tih thu an sawi bawk.

Helen Lowry Higher Secondary School NSS unit chuan nimin khan an sikulah blood donation camp an huaihawt a, Aizawl Civil Hospital tan thisen unit 58 an pe a, a petute mipa 53 leh hmeichhia panga an ni.

Reiek RD Block hnuaia Block Mission Mangement Unit, Mizoram State Rural Livelihoods Mission (MzSRLM) leh AH&Vety department-te chuan August 16, 2019 khan Reiek khuaah a thlawna ran entirna, Free Animal Health Camp an buatsaih a; mi 101-in an ran vulh - ar, vawk, bawng leh kelte an entir a, an mamawh angin damdawi a thlawnin an sem a ni.

Nimin khan Lawngtlai DC conference hall-ah addl. DC B Lalchhawn­tluanga hoin kumina Zirtirtute Ni (Teachers Day) hman dan tur sawiho a ni a, he ni pual hian DEO, LADC-a Education department leh RMSA-te'n banner siamin, khawpui ­chhung hmun remchang laiah tar leh Bawrhsap thuchah buatsaih cable TV kal tlanga pek chhuah an rel.