NTUM-in MR-te dinhmun ṭha zawk pek an phût
National Trade Union of Mizoram (NTUM) hruaitute chuan nimin khan Aizawl Press Club-ah thuthar thehdarhtute an kâwm a; "Hna thawktu hnuaihnung muster roll (MR)-te chawikanna chungchangah hma min laksak turin sorkar kan ngen a ni," an ti.
NTUM president C Remtluanga chuan, MR-te tan sorkar hnathawk pangngaite hamṭhatna dawn ang thlap dawn an beisei loh thu sawiin, "Mihring nihphunga thil tih âwm tak a nihna en pawhin dinhmun ṭha hret zawka chawikan hi a Mizo rilruin a Kristian rilru a ni. MR-te chu ran chhawr ang maia kum 60 an tlin thleng an thawh hnuah chhawmdawlna dawng loin an mai pár thlawn tawp ṭhin," a ti a; mai par thlawn tawp chu mihring nihphung aṭanga thlirin tu tan pawh lungawi a harsat thu a sawi.
NTUM-in MR-te tana an phûtte
l Ṭawngka maia hna aṭanga MR-te bàn theihna ziaka dah a nih dawn chuan, hriat sual vang te, dâwt hmangte leh inhuat vangtea inbân theih a nih vangin thiam thu sawi theihna hun vawi khat tal pe se.
l Casual leave ni ruk tal kum khatah pe ve se, earned leave/special leave pek ve dan awm se.
l Thla tin hlawh percentage tlem belh mai loin damlo inenkawlna atan chhawmdawlna (medical benefit) ṭha zawk pe ve se.
l MR lak danah exam chi khat chauh ni tawp loin, education/technical qualification hi tehfung mumal taka hman ni tawh se. Skill kaisanna dan, dilna thehluh tawh pawh tihfelsak vat ni se (Labour Law aṭanga lak chhuah a nih loh chuan).
l MR-te hlawh hi Minimum Wages Act, 1948 hmanga pe tawh loin, pay structure thar siamsakin hnaa an luh ve theihna tur post-a an hlawh chanve aia tlem lo pek ni se. Kum tin hlawh pung (annual increment) pawh a âwm tawkin siamsak ve ni se. Promotion hmanga hlawh san ve zel theihna siamsak a nih loh chuan, kumbi tuka hlawh tihsanna (ACP) siamsak ve ni se. Hlawh ennawn pawh hunbi neia tih ni se.
l MR-te hi dinhmun tihdanglamsak an nih a, trade union hnuaia pawl din/zawm phal loh a nih chuan, kaihhruaina (conduct rule/guidelines/work manual) siamsak ni phawt rawh se.
l Ran chhawr anga MR-te chhawrin an thawh hun chhung chauh hlawh pek ni bik tawh loin, hun ṭha zawng zawng sénga kum 60 thleng thawk thei an nih avangin hna
aṭanga bàn tâkte kut bénga an chhuah tawp tawh bik loh nan chhawmdawlna (pension/gratuity etc.) an hmuh ve phâk tâwk tur ruahmansak ni se.