Hmasawnna tluantling nei turin mipui rilru sûkthlêk siam dik a ngai - TJ Manuna

Minister of state TJ Lalnuntluanga chuan nimin khan a bial chhunga New Champhai, Zotlang leh Ruantlang tlawhin, khawtlang hruaitute nen an inkâwm a; hmasawnna tluantling leh tlo nei turin mipui rilru sûkthlêk siam dik hmasak a ngaih thu a sawi.

Minister TJ Lalnun­tluanga chuan, ram dinhmun ngaihtuah chung zela mamawh dan indawt­in, rualkhai taka hmasawnna ruangâm siam a pawimawh thu a sawi a; mipuite chu 'Pathian leh kan ram tan' tih thupui changchawi fo a, Pathian­in ram min pek hlu tak chu neitu rilru pu chunga enkawl tur leh, chhungkua  leh khawtlang tana rinawm taka hna thawh tum  ṭheuh turin a chah.

Sorkar department office dawr turin Champhai leh Aizawl kal a ngai fo tih sawiin TJ Lalnun­tluanga chuan, a biala khuate a tlawh kual chu mipuite harsatna chhâwk zângkhai tur leh tiziawm thei turin kawtkaiah pisa hûn hnaih a nih thu leh hlâwk thlak tak a nih a beisei thu a sawi a, "Ram siamṭhat nan mipui leh sorkar thawhho ṭhat a ngai a, vawiin hian hetiang hun hi hman a ni," a ti.

Minister chuan, Cham­phai District Hospital tihchangtlun tuma hmalak a nih thu leh Zo fate khawchhak lam thleng pawha an pan theih tur khawpa thuam ṭhat a, mamawhtute tana awlsam taka hmanrua leh thawktu  pan theiha awm thei tura ngaihtuahna sen a nih thu a sawi a; inkalpawhna leh inbiakpawhnate bakah, khawtlang mamawh ang­te pawh a ṭul ang zelin a tahtawla tihchangtlun zel a nih tur thu a sawi bawk. 

TJ Lalnuntluanga hnenah hian khawtlang hruaitute'n an khua leh veng mamawhte an lo thlen a, an sawiho nghal zel bawk a; Champhaia sorkar department hrang hrang hotute'n an ṭawiawm a ni.