Plastic Free City hlawhtlingah ngai

Deputy chief minister Tawnluia, UDPA department enkawltu chuan, Aizawl khawpui Plastic Free City ni tura Aizawl Municipal Corporation (AMC) hmalakna chu a hlawhtling chho hle a, chak taka hmalak zel a nih thu a sawi.

Plastic Free City ni tura Aizawl puan leh hmalaknate chu sorkarin a hlawhtlinga a ngaih leh ngaih loh nimina Assembly session-ah opposition group leader Lalduhoma'n a zâwt a; ram pum huapa hmalakna chi zawk a ni em, tiin rawtna a siam bawk.

UPDA minister Tawnluia chuan, Plastic Free City-a Aizawl puan a hlawhtlin theih nan Aizawla college leh higher secondary school zawng zawng, university, zirna in dang leh Pathian thu zirnaah te, local council ṭhenkhatahte leh catering service-ahte awareness campaign neih a nih tawh thu a sawi a, "Hmalak hma ai chuan hma kan sâwn khawp mai. Mahse, vawi leh khatah hlawhtlin nghal theih a ni lo a, kan rilru siam fel hmasak a ngai a ni," a ti.