Scouts & Guides Rally hawng

State Training Centre, Tanhrilah 'Mizoram Bharat Scouts & Guides 14th State Rally' buatsaih a ni a, nimin khan Mizoram Bharat Scouts & Guides vice president Robert Romawia Royte, Sports minister-in a hawng. Rally hi February 24-28 chhunga neih tur a ni.

Robert Romawia Royte chuan, rally chu Mizoram Bharat Scouts & Guides-in kum 2009 hnua rally an neih lehna hmasa ber a nih avangin Mizoram tan a hlut thu a sawi a, "Bharat Scouts & Guides chuan inkaihhruaina leh a thil tum bul lian tak takte in hre chiang tur a ni a, mi dangte tana nun leh ṭhenawm khawvengte laka tih tur te, mi dang ṭanpuitu tur in nihnate hre reng ang che u," a ti.

Mizoram Bharat Scouts & Guides 14th State Rally 2020-ah hian Aizawl South, Aizawl North, Aizawl West, Aizawl East, Kolasib, Lawngtlai, Mamit, Siaha, Serchhip leh  Lunglei aṭangin Bharat Scouts & Guides rally ranger, service guide leh official riak lut mi 407 an awm a ni.

Rally-ah hian inelna hrang hrang - march past, hnam làm, quiz, pioneering project, food plaza, pageant show, painting competition leh a dangte buatsaih a ni dawn a; adventure lam thil tih a ni dawn bawk. Base hrang hrang ṭha taka zote chu certificate/award pek an ni dawn a, Rally Friendship Games pawh buatsaih a ni ang.