Sorkarin state lottery a titawp lailâwk Hlâwk zawka kalpui tum a ni - Finance dept.
Mizoram sorkar chuan August 2019 aṭangin Mizoram state lottery chu a titawp lailâwk. Finance department hotute chuan, lottery chu hlâwk zawka kalpui tum a nih thu an sawi.
Vanglaini palai zawhna chhangin Finance department hotute chuan, lottery distributor zingah Gauhati High Court-a zualko an awm avangin lottery chu kalpui theih a ni rih lo tih an sawi a, "Distributor-te kha July 2019 thla tàwp thleng an hun pawhseisak an ni a, hun tiam a zawh hnu August 1 aṭang chuan kalpui a ni tawh lo. Lottery hi kalpui leh a nih theih nan hmalak mek a ni," an ti.
Finance department hotute chuan, sorkar tharah kalphung thara lottery kalpui tum a nih thu sawiin, "Kalphung thar hmang turin ruahmannate kan siam vek tawh," an ti a; kalphung thar tur an ruahman anga lottery chu kalpui theih a nih chuan a hma aiin Mizoram sorkarin an hlâwkpui zawk tur thu an sawi.
Finance hotute sawi danin, paper lottery atan tender chhuah a ni a, distributor tur pawh thlan a ni tawh. Mahse, Court-ah zualko an awm avangin distributor tura thlante chuan lottery an kalpui thei rih lo. Court chuan kar lehah thubuai a ngaihtuah dawn a, thutlukna a siam dan azirin ruahmanna siam a ni ang.
Online lottery atan erawh chuan tender chhuah a la ni lo. Online atan pawh hian tender chhuah tum a ni a, mahse, kalpui dan turah Ministry of Home Affairs (MHA)-in thil fel tâwk lo awma an hriat avangin tender chhuah a ni rih lo. Hemi chungchang hi kar leh lamah MHA official leh Mizoram sorkar official-te'n an sawiho dawn.
Online tender hi Goods & Service Tax (GST) hman a nih hnuah chhiah chawi ngai a tam tâk avangin distributor-te'n an bawh vak lo. GST vanga lottery-a harsatna awm chu GST Council Meeting-ah pawh sawi chhuah ṭhin a ni a, mahse, chinfel theih a la ni lo.
Lottery tihtâwp lailâwk a nih hma hian Mizoram State Lottery hnuaiah distributor pali an awm a; paper lottery chu Teesta Distributors-in a buaipui a, online lottery chu firm pathum - Summit Online Trade Solution, NV International leh Ecool Gaming Solution ten an kalpui thung.
Sorkarna chelh mektu MNF-te chuan eptu an nih lai khan Mizoram sorkarin lottery a kalpui danah thil felhlel a awm thu an lo sawi tawh ṭhin a, thuthar thehdarhtute pawh ṭum eng emaw zat an kâwm a ni.