V/C-ah ruling an nih vanga thlan tlinte an inluling deuh zel - ZPM Secretary General

Zoram People's Movement (ZPM) chuan February 24, Thawh-­­ṭanni zan khan Vaitin khuaah van­tlang inkhawm an buatsaih a, ZPM secretary  general K Sapdanga'n thu sawiin, local council leh village council-ah ruling party an nih vang ngawta thlan tlinte chu an inlulin deuh zel thu a sawi.

ZPM Secretary General chuan, tualchhung sorkar (VC/LC) ding mekte chu April 30, 2020-ah an hun (term) a tàwp dawn thu sawiin, "Hemi hma ngei hian Mizoram sorkarin inthlan thar a buatsaih turah ngai ila. ZPM chuan Mizorama khua leh veng tinte tualchhung sorkar ṭha tak nei turin  duhsakna sang ber kan hlan a ni," a ti.

K Sapdanga chuan, tualchhung sorkar chu state sorkar chhiahhlawh emaw, kutkê tur an ni lo tih sawiin, "Keimahni a thlangtu tualchhung mipui rawngbawltu, mipui kutkê tur zawk an ni," a ti a; tualchhung sorkar chelhtu turte an thlan hunah thil dang zawng aiin tualchhung mipuite'n an mi duh zawng an thlan a pawimawh thu a sawi.

Ruling party nih vang ngawta thlan tlinte chu thlan tlin an nih hnuah an inluling deuh zel nia sawiin Sapdanga chuan, "Tualchhung tihhmasawnna aiin, mahni hamhaina contract hna lam an buaipui nasa zawk ṭhin. Chuvangin, tualchhung sorkar atan chuan ruling mi an nih leh nih loh aiin, khua/veng hmasawnna vei mi, mipui kutkê atana mi rinawm leh taima an ṭha ber zel a ni," a ti.

ZPM Secretary General chuan, 'Ruling páwl thlan tlin loh chuan development sum lamah hrêk in ni ang' ti zawnga invauna leh insawi­ṭhaihna a awm ṭhin tih sawiin, "Chumi awmzia chu, 'Nangni khua/veng ai chuan kan party kan ngai pawimawh zawk' tihna mai a ni. Politics khelh dan tenawm ber, ram hlui zia dik tak a ni," a ti a; chutiang hmanrua hmang duhtute chu mipuiin an hnâwl ngei zawk tur a nih thu a sawi.