MHIP OB chuh thei tur thlang

Mizo Hmeichhe Insuihkhawm Pawl (MHIP) General Headquarters office bearer (OB) chuh tur thlannaa vote tlate chu nimin khan chhiar a ni a, OB post parukte chu mi 20-in an chuh dawn.

Court thu angin Firms & Societies Registrar chuan MHIP Gen. Hqrs. OB chuh thei tur thlanna a buaipui a, nimin chawhnu dar 1 khan vote tlate chhiar a ni. MHIP Gen.Hqrs. OB chuh theih tur hian general headquarter-in mi 10 an ruat a, a dang 10-te chu thlan an ni. OB post chuh tur hian sub-headquarter-in mi pahnih, block-in mi pakhat leh Aizawl khawpuia branch-te'n mi pakhat ṭheuh an vote thei a ni.

Gen.Hqrs-in a ruat/thlan ni lo, thlan chhuaha vote hmu sang 10-te chu nimin khan tihfel a ni a, chu'ng mite nen chuan mi 20-in MHIP Gen.Hqrs. OB post an inchuh dawn a, Central YMA kaihhruaina hnuaiah inthlan a ni ang.

Tarlan tawh angin, MHIP chuan April 16-17, 2019 khan Vanapa Hall-ah General Conference an hmang a, August 17 chu hruaitu thlan hun tura ruat a ni. Mahse, hruaitu thlan tur chungchangah Court-ah zualko an awm avangin inthlan theih a ni lo a, Court-in ruahmanna a siam angin hruaitu thar thlan a ni dawn ta a ni.