Tawlhloh puan leh Puanchei GI tag pek a ni Congress sorkar rah chhuah a lang - MPCC

Sorkar laipuia Department for Promotion of Industry and Internal Trade (DPIIT) chuan tun hnai khan Mizo puan pahnih - Tawlhloh puan leh Puanchei te chu Geographical Indication (GI) tag a pe a, puan dangte pawh GI tag pek leh thuai beisei a ni. Hemi chung­changah hian Congress party chuan thuchhuah siamin, Congress sorkar laia hmalakna rah chhuah a nih thu leh lawmawm an tih thu an tarlang.

DPIIT chuan August 14, 2019 khan Tawhlohpuan leh Puanchei te chu Geographical Indication tag a pe a ni. Mizoram sorkara Mizoram Science Technology and Innovation Council (MISTIC) hnuaia Patent Information Centre chuan Mizo puan panga chu GI hmu turin kum 2017-ah dilna an thlen. Dilna an thlen puan panga zinga pahnih - Tawlhlohpuan leh Puanchei te chu GI tag a rawn pe ta a, Mizo puan dang pathum pawh GI tag pek thuai beisei a ni.

MISTIC hotute hnen aṭanga thu dawn danin, Mizo puante Mizote ta ngei a ni tih sorkar laipui­in a chhinchhiah theih nan hian MISTIC hnuaia Patent Information Centre leh Art and Culture department chuan kum 2016-ah memorandum of understanding an ziak.

MPCC chuan, dan ang taka Mizo hnam puan hrang hrangte Mizo puan ngei a ni tih chhinchhiahna pek chu thil pawimawh tak a nih thu sawiin, "He hmalakna hi Pu Lal Thanhawla kaihhruai Congress Ministry hun lai, kum 2015 aṭanga Art & Culture department leh Science & Technology department-te hmalakna kal zel hlawhtlinna lo lang ta a ni a, lawmawm kan ti hle a ni," an ti.

Congress party chuan, Congress ministry laia Social Welfare department hmalakna ṭha tak avangin Mizoram chu Poshan Abhiyan hnuaia hma la ṭha bera thlan a ni tih sawiin, "Mizoram hi ICDS-CAS Implementation leh Overall Excellence Implementation-ah ti ṭha bera puan a ni," an ti a; chu lawmman chu August 23, 2019 hian New Delhi-ah sem a nih dawn thu an tarlang.

MPCC chuan, Health Index thar ber, June 25, 2019-a tihchhuahah state tê zinga state hrisel bera Mizoram puan a ni te, July 11, 2019-ah Agriculture Today buatsaih Agriculture Leadership Conclave-ah Best Horticulture State Award Mizoramin a dawngte chu Congress sorkar hmalakna rah chhuah a nih thu an sawi a, "Hmasawnna kawng hrang hranga Congress ministry thawh ṭhatzia a lang zel a ni," an ti.

Sorkar laipuia Department for Promotion of Industry and Internal Trade (DPIIT) chuan August 14, 2019 khan Mizo puan pahnih - Tawlhloh puan leh Puanchei te chu Geographical Indication (GI) tag a pe a, puan dang pathumah pawh GI tag hmuh leh thuai beisei a ni.