Mizoramah ASF hmuh a la ni lo
Animal Husbandry & Veterinary department director Dr Hmarkunga chuan, Mizoramah African Swine Fever (ASF) case hmuh a la nih loh thu a sawi. Hetih lai hian, August 19, Thawhṭanni zan khan Myanmar
aṭanga Mizorama vawk phurh luh rûk man leh a ni.
Vanglaini palai zawhna chhangin Dr Hmarkunga chuan, Mizoramah ASF case hmuh la ni lo mah se, fimkhur erawh a ngai hle tih a sawi a, "Myanmar ramah ASF a léng tih confirm a ni tawh a, anni nen hian inhne reng kan nih avangin fimkhur a ṭul hle. ASF kai tawh vawkte chu an thi deuh vek a, a tihdamna a awm lo. PRRS aiin a hlauhawm daih zawk a ni," a ti.
AH&Vety Director chuan, vawk sa lei tur tlem deuh rih mah se, ram dang aṭanga vawk lak luh a nih lohna tura an hmalakna chu thláwp turin mipui a ngen a, "Tunah hi chuan vawk sa aiin sa dang i ei rih mai ang u. ASF hi kan rama a rawn thlen chuan kan tuar nasa dawn hle a ni," a ti a; China rama ASF a lèn ṭum pawhin ni 20 chhung lekin ram pum a tuam hman thu a sawi.
A rûka vawk la lut ṭhinte chu sorkar anga hmalakna ringawt chuan vèn hneh tak tak a harsa hle tih sawiin Dr Hmarkunga chuan, "Hma min lâkpui turin mipui, thuthar thehdarhtute leh NGO hrang hrangte kan ngen a, ti lui tlatte chu a rang thei ang bera thuneitute hnena thlen turin mipui kan ngen tak meuh a ni. CYMA, CYLA leh MTP hnenah chuan min ṭanpui tura ngenna kan thawn tawh," a ti.
AH&Vety joint director Dr Saihlira pawhin ASF a lên lohna atana an hmalaknaah tlawmngai pawl leh police-te'n an thlâwp ṭhat thu sawiin, "Kan lawm tak zet a ni. Awareness campaign hmun hrang hrangah kan nei tawh a, neih leh vek a ṭul," a ti a, an department-ah rapid respond force an din a, Mizoramah ASF a lên lohna atan theihtawp an chhuah thu a sawi.
Dr Saihlira sawi danin, AH&Vety department-a thawkte chuan August 19, 2019 zan khan Myanmar aṭanga Mizorama vawk lak luh motor-in a phur an hmu a, East Lungdar aṭanga ûmin, Mualphengah an ûm phak a ni. Motor-ah hian vawk puitling pakua phurh a ni a, AH&Vety department chu man theitu an nih loh avangin vawkte chu police hnenah hlan a ni.