KHAWTHLIR

Economics and statistics department buatsaih, Champhai District Statistical Handbook 2018 chu nimin khan Economics & Statistics director Lalrikhuma Sailo-in Champhaiah a tlangzarh. Lalrikhuma chuan, hna leh thil tihnaah statistics-a innghat loa kal chuan a tàwp khàrna a felfai lo fo tih sawiin, "Statistics tel lo chuan thu awmze nei sawi a har tawh ṭhin a ni," a ti.

Nimin khan Secretariat kawtah Sadbhavana Day hman a ni a, he ni puala thutiam (pledge) an siam chu GAD secretary Ashish Kundra hoin Secretariat-a thawkte'n an chham rual. Prime minister hlui Rajiv Gandhi pian champha August 20-ah kum tin Sadbhavana Day hman ṭhin a ni a; ram chhung hmun hrang hrangah mipui inlungrualna, remna leh sakhaw tinte inlungrual­na atana intiamna neih ṭhin a ni.

August 30, 2019-a Aizawla veng pathum - Chaltlang, Chhinga Veng leh Kanan Venga local council by-election neih tura inpuahchahna kal zelah nimin khan  election official-te tan Aizawl DC conference hall-ah training buatsaih a ni. He hunah hian returning officer, assistant returning officer, presiding officer, polling officer leh by-election-a mawhphurhna nei official dang mi 70 vel an tel a ni.

Aizawl Traffic Police chuan tunlai hian chhun lamah Aizawl khawpui chhunga hmun hrang hrangah No Tolerance Special Drive an nei mek. Special Drive-ah hian dan bawhchhiaa lirthei khalh leh document felfai lo eng emaw zat ni tin an man. Traffic police hotute chuan, Special Drive chu an chhunzawm zel dawn thu Vanglaini a hrilh.

Central KṬP chuan nimin khan Synod Hospital Charity Fund-ah Rs. 6,00,000 an hlan. KṬP General Conference rorel angin, hmun hrang hranga KṬP branch-te chuan Thawhṭanni zana KṬP inkhawma vawi khat thawhlawm chu Hospital Charity Fund atan CKṬP-ah an thawh khawm a; sum tling khawmte chu nimin khan CKṬP leader Rev.Dr K Lallawmzuala'n Synod Hospital hotute hnenah a hlan a ni.