S. Korea-a APYE-ah minister Lalchhandama a tel

School Education minister Lalchhandama Ralte, Mizoram Youth Commission (MYC) chairman Dr Vanlalṭanpuia, MLA leh MYC official ṭhenkhatte chu Hanyang University, South Korea-a neih mek Asia Pacific Youth Exchange-ah an tel a; Minister hian August 19, Thawhṭanni khan a hawnna inkhawmah thu a sawi.

Lalchhandama Ralte chuan, Mizoram chu Britain-in India ram a awp hma daih tawha khaw tina lal hran neia inrêlbâwl ṭhin a nih thu a sawi a, "Sap hoin Mizoram an chhuahsan hnuah India lakah zalenna a sual a, kum 20 zet indo a nih hnuah MNF leh India sorkarin June 30, 1986-ah inremna puitling an ziak a, Mizoram chu state puitlinga hlân kai a ni," a ti.

Zirna chungchang sawiin minister Lal­chhandama chuan, "Mizoram chuan zirna-in nei mah ila hmanraw ṭha kan nei tâwk lo a, kan zirlaite'n thiamna leh finna sang tak nei mah se, an thiamna chher hriama khawvel hmun danga zir turin remchanna an nei ṭha tâwk lo," a ti a; zirna lamah Mizoram tan rualawh a la nat thu a sawi.

Lalchhandama Ralte chuan, APYE dintu Hyoung Min Kim leh Alinery Lalngilneii Lianhlawng, Rochun dintute zara Mizoram ṭhalai mi 13-te Asia Pacific Youth Exchange-a an tel thei chu lawmawm a tih thu sawiin, "Kan hmasawnnate la muang rih mah se, mi tumruh ṭhalai kal hmasate zarah danglamna thlen tura kan thawkho thei tur hi a lawmawm hle a ni," a ti a; Hyoung Min Kim leh Alinery Lalngilneii Lianhlawng te chu an hmalak zelna turah duhsakna a hlan.

Minister hian Mizoram aiawha kalte mikhualtu Hanyang University, Keimyung University, Asian Development Bank, UNDP, Urban Youth Academy leh ram hrang hrang aṭanga ṭhalai kal khawmte chu nakkuma APYE, India-Mizorama neih a nih theihna tura hmalakpuiah a sàwm bakah, tel leh ṭheuh turin a sáwm a ni.

APYE South Korea 2019-ah hian ram hrang hrang aṭangin palai 150 an tel a, ni 10 chhung a awh dawn. APYE hi regional youth program a ni a, Asia Pacific ramte aṭanga ṭhalai thlan chhuahte chu United Nations Sustainable Development Goals (UNSDG) hmangin programme neihna ram chhunga khaw hrang hrangah zir chianna nei tura tirh chhuah an ni ṭhin. Tun ṭuma APYE-ah hian thupui atan 'Multiculturalism' tih an hmang.

Mizoram aṭanga telte zingah MLA Lalrinsanga Ralte, Mizoram University-a zirtirtu Prof. Laldinpuii Hmar Fente leh MYC joint director Malsawmdawngliani te pawh an tel a; kum 2020-a Mizorama APYE neih theih dan tur an buaipui nghal a ni.