Dr Beichhua'n Siahaa END pisa a tlawh

Excise & Narcotics minister Dr K Beichhua chuan nimin zing khan Siahaa Excise & Narcotics assistant commissioner office a tlawh a; assistant commissioner Lalhmingthanga leh thawktu dangte hmaah fuihna thu a sawi.

Dr K Beichhia chuan, hmun hrang hranga Excise & Narcotics department (END) office a tlawha amah tihlim ṭhintu chu, END enforcement staff-te hmel thar a hmu zel ṭhin chu a nih thu a sawi a, "Tun hma chuan kan sipaite leh staff-te ruihloin a tibuai hmel pu ngawih ngawih an tam a ni," a ti.

END Minister chuan, MNF party chu an intiam ang ngeiin an sorkar aṭanga rei lo têah zu zawrh an tihtawp nghal thu sawiin, "Chief Minister pawhin ruihlo do leh enkawl zui ngaite chhawmdawl hi hna pawimawh hmasa berah a nei a, a lawmawm hle. Enforcement lam indaih lo hle mah ila, Pathianin kan hma a hruai ang a, kohhran leh NGO-te kan hnungah an awm reng bawk," a ti a; Home department lam pawh END pui tura an inhuam reng thu a sawi.

Ram leh hnam dinchhuahna bul chu mi tlemtê thawhrimna leh huaisenna rah a ni ṭhin tih sawiin K Beichhua chuan, "Excise department hi tlem hle mah ila, kan hnathawh leh kan rál doah kan chian a ngai a, kan hna hi rinawmna leh inpumpekna nen i thawk ṭheuh ang u," a ti a; tam aiin thawhrim a pawimawh zawk thu a sawi.

Dr K Beichhua hian nimin zing vêk khan Siahaa Taxation complex-a office thar sakna hmun tur te, ICDS office building sak mekte a enfiah bawk.