KHAWTHLIR

State Bank of India (SLBC convener bank) chuan vawiin aṭanga February 28, Zirtawpni thleng khian Millennium Centre chung záwlah Look East Customer Outreach programme an buatsaih dawn. Outreach programme-ah hian PM Kisan ṭanpuina dawngtute hnenah KCC loan pek tum a ni a; a mamawhte hnenah MSME hnuaiah MUDRA, Stand-Up India loan pek te, PMJJBY leh PMSBY-ah a duh apiang enrolment tihsak leh bank account hawng thar duh tan hawnsak tum a ni.

Govt. Aizawl College NSS leh Red Ribbon Club-te chuan nimin khan an college-ah blood donation camp an huaihawt a, Aizawl Civil Hospital tan thisen unit 211 an pe a, a petute mipa 136 leh hmeichhia 75 an ni.

Cod Nerc hnuaia project pakhat, Accelerate Orphans and Vulnerable Children Project chuan nimin khan Chhinga Veng YMA community hall-ah an naupang enkawl 150-te tan general health check-up camp an buatsaih. OVC Project hian a tum ber chu, Mizorama HIV hrik pai fate theih tawpa dâwm kân leh an nun kawng khalh ngìlpui tura ṭanpui a ni.

Mizoram sorkar chuan Mizoram Public Service Commission (MPSC) member atan FJ Liantluanga, MCS (Rtd.) leh Malsawmdawngliana, MES (Rtd.) te a ruat thar. DPAR chuan nimin khan notification a chhuah a ni.

Nimin khan Lawngtlai leh Bungtlang South RD block chhunga 'Sujal and Swachh Gaon' kalpui tura trainer turte tan Central YLA Hall, Lawngtlaiah training buatsaih a ni. Training-ah hian Lawngtlai block aṭangin mi 40 leh Bungtlang South block aṭangin mi 51 an tel a, mithiamte'n hmalak dan tur leh hnathawh dan turte an zirtir. 

March 13, 2020-a CADC-a village council (VC) 88-a VC inthlan buatsaih tur leh Lawngtlai Council Venga VC by-election neih tura presiding officer 123-te chu nimin khan Lawngtlai DC conference hall-ah training neihpui an ni a; Election officer Lalremruata Sailo leh AERO Hmingmawizuala ten thil pawimawhte an zirtir.