Ramria chêtnaah sorkarin hma a la Kum 5 chhungin ILP dik lo 20,765 man a ni
Home minister Lalchamliana chuan, Vairengte dáia Assam sorkara Forest department-in in (building) an chei/sak titawp tur leh, Bairabi Zophaia Mosolman mosque sak mek titawp turin Mizoram sorkarin hma a lak thu nimin khan Assembly House a hrilh. Kum 2015 aṭanga January 2020 thlengin ILP 5,53,321 pek chhuah a ni tawh a, ILP dik lo 20,765 man a nih tawh thu a tarlang bawk.
ZPM member Andrew H Thangliana zawhna ziaka chhangin Home Minister chuan, Vairengte dáia Assam sorkarin in a sak chungchangah Mizoram sorkar chuan July 26, 2019 khan lehkha No.D.32019/4/2019-HMP dated 26th July, 2019 hmangin Ministry of Home Affairs-ah lehkha thawn a ni tih a tarlang. Lehkhaah chuan, Assam sorkarin in an sak chu status quo bawhchhiatna a nih thu leh Assam sorkar hnenah an hmalakna titawp a, status quo vawng nung tura thurawn pe turin rawtna thlen a ni.
Mosolman-te'n Zophaia mosque an sak chungchangah Lalchamliana chuan, "Mizoram sorkarin ramri buai zir chiang tura a din Core Committee September 6, 2019-a meeting thurel bawhzuiin masjid satu Kachurtol Masjid Committee-te chu an hmalakna titawp turin Kolasib DFO chuan lehkha No.B.23013/2/2015-DFO(K) dated 9th September, 2019 hmangin a hriattir a. Chief Secretary, Govt. of Mizoram pawhin D.O.No.F.20015/15/2018 dated 22nd October, 2019 hmangin Assam sorkarah status quo bawhchhiatna a nih avanga titawp tura hmalakpui turin thlen a ni," a ti.
Zawhna dang chhangin Home Minister chuan, kum 2015 aṭanga kumin January thla thlengin Inner Line Permit (ILP) 5,53,321 pek chhuah a nih tawh thu a tarlang.
Lalchamliana chuan, kum 2015 - January 2020 inkar chhungin enforcement-te'n ILP nung lo mi 20,765 chhui chhuakin an man tawh tih a tarlang a, "Kum 2015 - January 2020 inkar chhungin mi 19,220 thawn kîr a ni tawh," a ti.
Home Minister chuan, Mizoram sorkarin ILP checkgate hrang hrangte thuam ṭhat a tum mek a, a theih chin chinah online ILP system kalpui vek a nih theih nan hmanraw ṭulte lei tum mek a nih thu a tarlang bawk.