Vanglaini logo

Hmun 16-ah phûl lem phah tum a ni

MNF member L Thang­mawia'n Lengteng bial chhung, Ngopaah emaw khelmualah phûl lem phah ve theih a nih leh nih loh a zawhna chhángin Sports Mi­nister chuan, "Phûl lem phah hi tih belh zel kan tum a, ka commit thei lo a, mahse, mitthlaah chuan a lang a ni," a ti.

Sports & Youth Services (SYS) minis­ter Robert Romawia Royte chuan nimin khan ZPM member Andrew H Thangliana zawhna chhangin, sorkarin tun dinhmun­ah Mizorama hmun 16-ah phûl lem (artificial grass) phah tumin ruahmanna a neih thu House a hrilh.

SYS Minister chuan, hmun 16-ah phûl lem phah tuma hmalak ni mah se, tun dinhmunah Kawnpui leh Thenzawla football khelmualah sum awm loh avangin phûl lem phah a la ni dawn lo tih a sawi thung.

MNF member Dr ZR Thiamsanga zawh belh­na chhangin Ro­bert Romawia chuan, Champhai North biala Hnahlan khelmualah phûl lem phah theih a nih dawn leh dawn loh tunah a sawi theih loh thu a sawi a, "Kan la en ang a, sum lam chu a awm thei ang. Kan phah ang, kan phah lo ang, kan ti thei rih lo," a ti. Champhaiah SAI din theih an duh thu a sawi a, "SAI hi direct-in kan khawih a ni lo a, mahse, kan nawr zel ang," a ti.

MNF member H Biak­zaua zawhna chhangin SYS Minister chuan, SYS department chu kum 34-a upa ni tawh mah se, Lung­leiah chiah district office an la neih thu a sawi a, "Department lam chuan district dang­ahte pawh SYS district office din kan tum a, ṭan kan la mek. Finance leh DPAR lam pawhin post awm tur zatte a pawm tawh," a ti.  Lawngtlai khelmual tihchangtlun tum a nih thu leh changtlung zawkin State Games buatsaih zel tum a nih thu a sawi bawk


Phûl lem phah tumnate
1.    Muallungthu, Aizawl district
2.    Chite, Aizawl district
3.    Tuivamit, Aizawl district
4.    Durtlang, Aizawl district
5.    Zemabawk, Aizawl district
6.    Hlimen, Aizawl district
7.    1st. MAP Ground, Aizawl dist.
8.    Edenthar Veng, Aizawl district
9.    Zemabawk Mitla Mual, Aizawl dist.
10.    Lengpui, Mamit district
11.    Saidan, Kolasib district
12.    Mualvawm, Khawzawl district
13.    Saitual, Saitual district
14.    Hnahthial, Hnahthial district
15.    Siaha, Siaha district
16.    Thingsen, Siaha district.