Zophaiah state 2 police inthiarfihlîm NGO-te'n IR awmna tur sak an rêl
Bairabi Zophaia buaina awm avanga Mizoram chhung ramri bula Mizoram police leh Assam police awmte chu nimin khan an inthiarfihlim ve ve. Hetih lai hian, Bairabi All NGO chuan, buaina chhuahna hmuna Mizo IR police-te awmna tur sorkarin February 12, 2021 (nimin) ral hmaa a sak loh chuan sak an rél.
Bairabi NGO-te'n Mizo IR-te awmna tur sak an phût thu thuchhuah siama an tarlan hnuah Bairabi Joint VC chuan thuchhuah siamin, Bialtu MLA hnen aṭanga an thu dawnte an tarlang. Bairabi VC tarlan danin, Zophaia Mizo IR-te temporary duty post atan puan-in kaih rih a ni ang a, sorkarin ramri-ah IR camp tur sak nghal a tum a ni.
Ramri thlenga lirthei kal theihna tur leilet záwlah temporary link road hnatlangin siam nghal tur a nih bakah, kawlphetha pekna tur electric ban phun tura hmalak a ni.
Bairabi YMA hruaitute aṭanga thu dawn danin, Bairabi VC-te thuchhuak ang hian nimin khan temporary link road siam a ni a, Mizo IR-te awmna tur puan-in pawh kaih nghal a ni; nimahsela a hnuah thuneitu sang zawk hnen aṭanga thu an hmuh angin, puan-inte chu sût leh vek a ni.
Mizoram police leh Assam police-te chu an state thuneitute thu an hmuh angin ramri aṭangin an insaseng ve ve a; Mizoram police-te chu Zophaia an camp-ah an kir.
Bairabi VC leh All NGO-te chu nizan khan an ṭhukhawm a, he thu ziah lai thleng hian an rorel kan hre hman lo. Bairabi YMA hruaitute sawi danin, VC-te nen an meeting zawhah DIG hoa meeting leh tur a ni.
Zawhna chhangin Bairabi YMA hruaitute chuan, Mizo IR-te awmna tur sa tura thutlukna an siam tawh chu an la sawhsawn lo tih an sawi a, "Bairabi VC leh Mizoram DIG-te nena kan meeting thu leh hla azirin kan hmalak zel dan tur rèl ṭhat a ngai mai thei," an ti.