INC candidate tur PC Laltlansanga Zu kan zuar tawh dawn lo - Hawla

MPCC president Lal Thanhawla chuan nimin khan Congress Bhavan-ah Serchhip biala MLA by-election awm tura an candidate tur chu MPCC general secretary PC Laltlansanga a nih thu a puang. Lal Thanhawla chuan, Congress an sorkar leh hunah zu an zawrhtir tawh dawn loh thu a sawi.

Lal Thanhawla chuan, Congress sorkar tla taah khan eirûkna lamah hmingchhiatna an nei lo nia sawiin, "Zu kan zawrhtir avanga tla kan ni. Zu zawrh kha ṭha kan tih vanga zuar kan ni lo a, in duh an awm reng a, zu a tam tho si a, zu chhia an in ai chuan, thununna hnuaiah zu zawrh mai ṭha kan ti a, mangan zawrh a ni," a ti. 

MPCC President chuan, "Kohhran member vek kan ni. Congress PAC ṭhukhawm chuan ngun taka kan ngaihtuah hnuin, Pathian leh mipui zara kan sorkar leh hunah kohhran duh loh a nih chhung chuan zu hi kan zuar tawh dawn lo," a ti a; kohhran pawi sawi an duh loh thu a sawi. 

PC Laltlansanga hi July 11, 1973 khan Serchhipah a piang a, a nupui fanaute nen Kulikawnah an chêng mek. Zirna lamah MA a ni a, kum 2005-2007 chhung khan MZP president a ni.