Congress khan sum an neih loh vangin Zu an zuar ta a ni - MNF Vice President

MNF vice president Lalthlengliana chuan nimin khan Aizawl Press Club-ah thuthar thehdarhtute a kâwm a; Congress kaihhruai sorkar liam ta chu sum neih loh vanga zu zuarah a puh.

Lalthlengliana chuan, Congress party-in 'Sum a harsa, Treasury an khâr ṭêp' tia MNF an beih thu sawiin, "Covid-19 avangin khawvel pum a buai a, India economy thlengin a tlahniam. Mizoram pawhin nasa takin kan tuar. Heti chung hian development-ah nasa takin hmalak a ni a, vawi khat mah treasury kan la khâr ve lo. Sorkar hnathawk hlawh pûksak pawh a hnu lawkah rulh leh nghal a ni," a ti. 

MNF Vice President chuan, kum 2012-2015 chhungin Congress sorkarin ways and means leh special ways and means hmangin cheng vbc. 1331.61 a pûk thu sawiin, "Sum hmuh belh a awm pawhin a pung an lo cut hmak hmak a, tam angin lang mah se, eng tham mah a taka chan tur a awm lo. Khatih laia CM khan, 'RBI-a kan sum dinhmunin a sen a kâwk reng a ni,' a ti hial," a ti. 

Leibat thâwm a len viau lai pawhin CM-in, 'Bat tam hi changkanna' a tih thu sawiin Lalthlengliana chuan, "Central lamah an sorkar tawh si lo, sum leh pai an nei si lo, kal ngaihna an hre ta lo a, thing lu bûla záwng dan ang chauh an ni," a ti a; an mangangin zu an zuar ta niin a sawi.

MNF Vice President chuan, MNF sorkarin lak luh a nih tûk aṭangin kawngah hma a la nghal nia sawiin, "Term  hmasa (Congress sorkar) khan MNF kawngpui siam sa an enkawl zui loh avangin a chhe em em. Thorang bialah phei chuan life insurance nei lo tan kal ngam chi a ni lo," a ti.

Central YMA-in 'Kawngpuiin duhthu a sâm lo' an ti chu an pawm thu sawiin Lalthlengliana chuan, "Kum tam tak kawng chhia hi Covid-19 karah duh angin hna a kal thei lo a, keini pawhin kan duhkhawp bik lo. Thingtlang hmun hrang hrangah kawngpui siam hnatlang koh a awm lo hi a lawmawm," a ti a; kawngpui ṭha neih thuai an beisei thu a sawi. 

ZPM chungchangah Lalthlengliana chuan, "Party din tam ber, policy thar sawi hnem ber an ni a, kalphung thar leh a hlui sawi tur hre ber tur an ni," a ti a; ZPM hruaitute'n kalphung thar tia an sawi ṭhinin din chhuahpui a la neih loh thu a sawi. 

MNF Vice President chuan, AMC inthlan tur chungchangah, "State sorkar nen lungrual taka thawkhoa hmasawnna thawk thei tur MNF candidate-te vote ṭheuh turin mipui kan sawm a ni," a ti. 

Zawhna chhángin MNF Vice President chuan, an manifesto leh SEDP buah Rs. 3,00,000 sem tur thu tarlan a nih loh thu sawiin, "Nuai thum sem hi sawi dan a inang lo thei ang. Kan sem mek a, kan sem tam dawn. An thawh ang zelin an hmu ang," a ti a; fanghma no ei hmak hmak tura sum sem ṭha an tih loh thu a sawi.