MPF leh party-te thawhhona thutlung Zâwm turin ZPM-in an mite an chah

ZPM hruaitute chuan nimin khan Aizawl Press Club-ah thuthar theh­darhtute an kâwm a; AMC inthlan turah MPF leh political party-te thawhhona thuthlung zâwm turin an party mite an chah.

ZPM vice president Dr Kenneth Chawngliana chuan, inthlan atana inbuatsaihnain a vàwrtàwp a thlen thu sawiin, "Inthlan buaipuitute'n felfai taka inthlan buatsaih tumin ṭan an la nasa hlein a lang. Thuthar thehdarhtute pawhin mipuite thinlungah inthlan boruak in tuh hneh a, thianghlim taka inthlan hmachhawntir in tum hle tih a hmuh theih. Inthlan buaipuitute leh chanchin thar thehdarhtute chungah lawmthu kan sawi a ni," a ti. 

Party tinte campaign ṭawng­kam ngaihthlak hrehawm a tlem ber ṭum a nia a lan thu sawiin Kenneth Chawngliana chuan, "Hei hi MPF-te thawh rah a nih a rinawm a, an ṭhahnemngaihna Pathianin mal a sàwmah kan ngai. Party tinte hi Pathian hnenah lawmthu sawi mawlh mawlh tur kan ni," a ti a; inthlan tak tak hunah pawh, Kristian rama inthlanna ni àwm rênga inthlanna thianghlim ni ngei se an duh thu a sawi. 

ZPM Vice President chuan, MPF leh political party-te thuthlung te, inthlan buatsaihtu election official thute zâwm turin party dangte an ngen tih a sawi a, "ZPM mite phei chuan zâwm ngei turin kan inchah nawn leh a ni," a ti.

Sorkar ṭha tun din a nih theih nan ZPM-in theihtawp an chhuah thu sawiin Kenneth Chawngliana chuan, "Langtlang, hriatpui theih leh hriatpui tlak, dan leh hraiin awmzia a neihna sorkar, thuneihna sem zâi sorkar a awm theihna turin mipui ṭawiawmna kan mamawh. Ṭhalaite'n politics an ngaihven thar hle niin kan hmu a, ram siamṭha tura pên chhuak zel turin kan ngen a ni," a ti a; party bil ni lo, mipui sorkar a din theih nan theihtawp chhuah zel turin mipui a ngen.

AMC inthlan turah ZPM an phûr thu sawiin ZPM Vice President chuan, "AMC inthlan hi kan la thu tak hle. He inthlana chak mai hi hlawhtlinnaah kan ngai dawn lo a, kan manifesto-te a taka chantir ngei kan tum dawn tih kan intiam thar leh a ni. Thawhhona ṭha tak avangin chak ngei pawh kan inring. Aizawl mipuite pawh beiseina thar nen kan naktuk atan kan vote hlu tak min pe turin in khawngaihna kan ngen a ni," a ti.