Minister/MLA-te polling station-ah An duh duha luh phalsak a ni lo

ZPM Ṭhalai chuan, AMC inthlana minister leh MLA-te polling station-ah an duh duha an luh phal a nih loh thu leh, vote thlâkna huam chhung (polling area)ah lirtheia party flag tár chungin tlàn luh phal a nih loh thu an tarlang.

ZPM ṭhalaite chuan an vice president Dr C Lalrammawia hmingin February 8, 2021 khan State Election Commission (SEC) Secretary AMC inthlan chungchang an zawtfiah a, February 9-ah chhanna an dawng tih an sawi a, "Kan zawhna chhànnaah AMC inthlan turah minister leh MLA-te polling station-ah duh duh luh phalsak an nih loh thu tarlan a ni hi lawmawm kan ti," an ti.

ZPM Ṭhalaiin an zawh pakhat chu, 'Mizoram state minister leh MLA-te hi AMC inthlanpuiah hian anmahni awmna ward-ah leh an awmna ward ni loahte polling station chhunga duh duha luh phal a ni em?" tih a ni. SEC chuan, Mizoram Municipalities (Election of Councillors) Rules, 2007 Rule 53D angin, phal loh a nih thuin a chháng.

'Dan anga Presiding Officer-in polling area a puan huam chhung, party flag leh symbol tàr phal lohnaahte Mizoram minister leh MLA-te'n an motor-a party flag tár chunga tlàn luh phal a ni em?' tia an zawhna chu phal a nih loh thua chhàn a ni bawk.

An zawhnate SEC-in a chhannaah an lawm thu sawiin ZPM ṭhalaite chuan, "Min chhànnate hi ward tina Presiding Officer (PO) hnenah SEC aṭanga thawn kual a ni a, lawmawm kan ti tak zet. SEC, Mizoram chungah lawmthu kan sawi a ni," an ti.

ZPM Ṭhalai chuan, kum 2020-a local council leh village council inthlannaah minister leh MLA-te polling station-ah an duh duhin an kal kual tih sawiin, pawi an tih thu an tarlang a; AMC inthlanah chuan dan bawhchhe tawh lo turin an ngen a ni.