Mizo MP-in ramri buaina a thlen

Rajya Sabha MP K Vanlalvena chuan February 11, Ningani khan Union minister of state for Home G Kishan Reddy chu a pisaah a kâwm a; February 9, 2021 zana Bairabi Zophai leh Gharmura, Assam-a thil thleng leh a kaihhnawihte a thlen.

K Vanlalvena chuan, Mizoram chhungah Mizoram sorkar mi tirhte Assam mite'n kut an thlâk thu te,  chumi hnuah mihring chenna in/ thlám hâl a nih thu te, Gharmura Mission Compound-a Mizo missionary chhungkuate chunga kutthlak a nih thute a sawi.

Assam-in a ṭhenawm state dangte nen ramri buai a nei vek tih sawiin K Vanlalvena chuan, "Hei hi British administration-in ramri dik lo a hnutchhiah vang a ni a, Assam state-a bet lo tur behtir avanga harsatna hi thleng ṭhin a ni," a ti.

Rajya Sabha MP chuan, "Ramri dik siam a nih loh chuan hmarchhak state-te hi ramri chungchangah ram hrang leh ram hrang ang maia indo thei kan ni," a ti a; sorkar laipuiin a rang thei ang bera hma a lâk a ngaih thu a sawi.

K Vanlalvena chuan, kum 2019-a Union Home minister Amit Shah hoa Mizorama NGO-te'n Delhi-a meeting an neih ṭumin Amit Shah chuan Mizoram chhunga Bangladesh ramria duty tur Mizo tlangvalte pualin BSF battalion din a lo tiam tawh tih a sawi a, "Hei hi tih hlawhtlin thuai a nih loh chuan Mizoram mipuite'n NDA sorkar hi rintlak loah an ngaih phah a hlauhawm a ni," a ti.