Mission Vengthlanga AMC Eco-Park Hmuh tur a awm lo - Congress Ṭhalai

Mizoram Pradesh Youth Congress Commi­ttee (MPYCC) chuan, Aizawl Municipal Cor­poration (AMC)-in Mission Vengthlanga AMC Eco-Park siam chu a taka hmuh tur a awm lo niin an tarlang.

MPYCC chuan, MNF party-in AMC achieve­ment video clip an siamah Mission Vengthlanga Eco-Park sawi lan a nih thu sawiin, MPYCC president Dr Lalmalsawma hoa a hmuna an enfiahnaah Eco-Park hmuh tur a awm lo tih an sawi a, "Thlanmual hmuna an structure sakte a chhe deuh vek tawh a, an sak anga an sawi hmuh tur mumal awm lote a awm a, pìpú, naupang inbûkna leh zuannate hmuh tur a awm lo," an ti.

MPYCC tarlan danin, 'Mission Vengthlang Eco-Park near Tlawng River' siamtu tura thlan contrac­tor chu Biakliana, Sikulpuikawn a ni a, Janua­ry 14, 2019-ah work order pek niin, sum ruahman chu Rs. 44,30,000 a ni.

Waiting shed pahnih, tree house pathum, plastic tuizém (lt. 2,000) pahnih, rigid pavement, retaining wall, pìpú, inbûkna leh naupang zuanna tur spring-te chu hmuh tur a awm mumal tawh lo.

Congress ṭhalaite chuan, "Ecological Park tia chhuang taka MNF AMC sorkarin infakna atana a hman hi thu dik lo hmanga mipui bumna mai chauh a ni tih hi a hmuna kal chuan kan hmuh dan a ni," an ti a; cheng nuai 44 sênga siam tura tihte chu a beitham hle niin an sawi.