AMC sorkarah khan sum hman dik loh a tam - ZPM Leader

AMC inthlan atan ZPM chuan nimin khan Ward-VIII huam chhungah street campaign an buatsaih a; thu sawitu ZPM leader Lalduhoma chuan, AMC sorkar liam ta MNF kaih­hruaiah sum hman dan dik lo a tam thu a sawi.

Lalduhoma chuan, Finance Commission-in AMC leh local body dangte sum chu Comptroller Auditor General (CAG) endiktir tura a tih thu sawiin, "AMC-a MNF sorkar khan CAG endiktir duh loin dan palzûtin chartered account an duh záwng ruaiin an audit tir. CAG sum endiktir a nih loh avangin sum hman danah an ngampa a ni," a ti. 

AMC ward hrang hrangah sum lut zat leh hman dan hriat a nih loh thu sawiin ZPM Leader chuan, "Inthlan dawnah miin an han ching let a, sum hman dan fel lo a tam em em," a ti a; ZPM-in sorkarna an chan chuan langtlang takin, ward committee hnuaiah ward fund-te hna thawhna atan hman a nih tur thu a sawi.

Lalduhoma chuan, sorkarna an siam chuan bawlhhlawh paih dan an tihdanglam ngei tur thu sawiin, "Bawlhhlawh báwm pali hûn reng in duh chuan MNF leh Cong­ress vote ula, báwm hnih chauh hûn in duh chuan ZPM min vote rawh u," a ti. 

Ward VIII-a ZPM candidate Christina Roluahpuii Sailo chuan, a naupanna vanga zàmna a neih loh thu sawiin, "Kumah naupang ber mah ila, hnathawhah chuan ka naupang ber bik lo ang," a ti a; kum lama naupang zawkte'n khawtlang hmasawnna atan hlâwk takin an thawk thei a ni tih lantirtu nih chu politics-a a luh chhan zinga mi a nih thu a sawi.