COVID-19: Mizoram dinhmun Enkawl lai 19 chiah an awm

February 11, Ningani khan Mizoramah Covid-19 vei mi pakhat hmuh chhuah a ni a, nimin khan hripui laka fihlîm tawh mi pahnih chhuahtir an ni thung. Mizorama COvid-19 positive hmuh tawh mi 4,391 zinga 4,363 an chhuak tawh a, 99.36% a tling.

Covid-19 vei hmuh thar awmchhun chu Rapid Antigen Test (RAT) hmangin Lungleia hmuh chhuah a ni a; Lunglawna hmeichhia kum 11 mi, hripui vei sûlhnu chhuina aṭanga swab sample endik niin, symptom nei lo a ni. ZMC laboratory leh TrueNAT-PCR hmanga sample endik zingah positive an awm lo.

Hripui laka fihlîm tawh nimina chhuahtirte chu Lunglei Pûkpui CCC leh Lawngtlai CCC aṭanga chhuakte an ni.

Mizoramah Covid-19 vei mi 4,391 hmuh chhuah a ni tawh a, mipa 3,213 leh hmeichhia 1,178 an ni. Nimin tlai dar 5 thleng khan mi 4,363 (99.36%) chhuahtir an ni tawh a, mi pakua (0.20%) thi tawhin, enkawl mek mi 19 (0.44%) an awm.

Ningani khan ZMC laboratory-ah swab sample 137, TrueNAT-PCR hmangin district paliah sample pariat leh RAT hmangin district pariatah sample 1,062 endik a ni a; sample endik zawng zawng chu 1,207 niin, chu'ng aṭanga Covid-19 positive hmuh chhuah pakhat chu 0.08% a ni.

February 9, 2021 thlenga Mizorama swab sample endik tawh zat chu 2,19,250 a ni a, chu'ng aṭanga Covid-19 positive mi 4,391 chu 2.00% a ni. Hripui vei hmuh tawh zinga mi 2,081 chu Mizoram chhunga kái an ni a, mi 2,310 chu Mizoram páwn aṭanga an rawn luh hnua hmuh chhuah an ni thung.

Mizorama district 11 zinga district pariat - Siaha, Champhai, Kolasib, Serchhip, Mamit, Saitual, Khawzawl leh Hnahthial district-ahte Covid-19 vei an awm tawh rih lo. District pathum - Aizawl (13), Lunglei (3) leh Lawngtlai (3) district-ahte chiah hripui vei an awm rih a ni.