Mission Compound beih MKHC-in dem

Mizoram Kohhran Hruaitute Committee (MKHC) chuan nimin khan thuchhuah siamin, February 9, 2021 zana Presbyterian Mission School (Mission Compound), Ghar­mura, Hailakandi district, Assam beih a ni leh headmaster H Vanlaldika leh a nupui fanaute chunga tharum thawh a ni chu pawi an ti a, an dem tak zet thu an tarlang.

MKHC chuan, ram tam takah sakhaw hmunhmáte zah a ni tih sawiin, "Harsatna leh buaina a awm cháng pawha inhumhimna, hmun hima ngaih a nih laia beih a ni leh hmeichhiate thlenga dimdâwina tel loa hriamhrei nena kut an thlak hi vanduaithlak kan ti tak zet," an ti a; pawi khawihtute chu man a, an phû tâwk hrem ngei an phût thu an sawi. 

Mission Compound bul hnaia awm Gharmura khaw mite'n hliamte thlavâng hauh a, buaina tireh tura hma an la leh hliamte Kolasib thlenga an hruai chu lawmawm an tih thu sawiin, MKHC chuan, "Hliam tuar Pu H Vanlaldika leh a chhungte leh Mission Compound-a thlabár taka awm zawng zawngte kan lainat em em a, an tan kan ṭawngṭai a ni," an ti. Mizoram leh Assam ramri bul hnaia chêngte inkarah boruak muanawm tak a awm zel an duh thu an tarlang bawk.