MNF candidate-te vote turin sáwm

MNF adviser Dr R Lalthangliana chuan February 11, Ningani tlai khan Zemabawka vantlang inkhawmah thu sawiin, MNF chu 'Pathian leh kan ram tan' titu party a nih avangin AMC inthlana MNF candidate-te vote turin mipui a sáwm.

Dr R Lalthangliana chuan, AMC chu kum 2006-2008 inkar vela MNF sorkarin a din a nia sawiin, "AMC kum 10 kal ta sorkar chhung khan a dintu MNF chu state-ah a sorkar loh avangin, a dintu leh hringtu ni lo sorkarah chuan AMC khan hma a sawn thei tak tak lo. Tunah AMC dintu MNF a sorkar tawh a, ward tina kan candidate-te hi thlang tling ila, development chu a rawn pár chhuak mai ang," a ti.

MNF adviser Robert Romawia Royte chu nimin khan Ward-XIX chhunga veng hrang hrang a tlawhnaah thu sawiin, ni tin MNF zawmtu an pung zel nia sawiin, "Tun kum hnih kal ta chhunga election hrang hrang awmah MNF kan chak tulh tulh chhan chu, MNF sorkar hnathawh ṭhat vang a ni," a ti.

Robert Romawia chuan, Covid-19 léng vangin sum leh páiah state tinin harsatna an tâwk vek nia sawiin, "Chuti chung chuan CM remhriatna avangin sport hmasawnna ruhrel siamin hmun hrang hrangah hnathawh a takin a lang chhuak mek a, ṭhalaite an lawm hle a ni," a ti a; sorkar laipui sum hmanga hmalaknate avangin Mizoram sorkarin chhiah leh labour cess aṭangin sum tam tak a la lut mek niin a sawi.

MNF ṭhalaite pawhin nimin khan Bungkawnah 'Sikpui fehchhuah' an buatsaih leh a, MNYF president Lalrinawma leh MNF hruaitu dangte'n thu an sawi.

Lalrinawma chuan, Aizawl leh a chhunga cheng mipui tihmasawn a, tithianghlim turin tute nge ṭha ber ang tih te, state sorkar nen rual taka hmasawnna hna thawk thei tur ngaihtuah chunga vote thlâk turin mipui a ngen a, "State sorkar hian thawhpui theih loh a nei lo a, football-ah chuan team angin an kal ṭhin. State sorkarin a thawhpui thiam tur team kan thlan thiam a ṭul a ni," a ti. 

MNF adviser Lalruatkima pawhin nimin khan Bawngkawn MNF campaign office-a ṭawngṭai rualna hun a hmanpui a; mi in luahtute leh in neitute phurrit su kiang turin The Mizoram Urban Areas Rent Control Act hmangin zalenna dár vuak a ni dawn niin a sawi.