EMRS 11 dinna tur hmuh a ni tawh

Social Welfare department (SWD) minister Dr K Beichhua chuan INC member Nihar Kanti Chakma zawhna chhangin, sorkar laipuia Tribal Affairs ministry aṭangin Mizoramah Eklavya Model Residential School (EMRS) 11 hmuh a nih tawh thu a sawi rualin, pahnih chiah a taka kalpui a nih rih thu House a hrilh.

Dr K Beichhua chuan, Mizoramah EMRS pahnih - Lunglei Pukpui leh Serchhip Kawlritlanga mite chiah a taka kalpui a la nih thu a sawi a; EMRS chu RD block huam chhungah tribal population 20,000 huam chin zelah din theih a nih thu sawiin, "ST population bik 50% tal a nih a ngai. A hmun hi state sorkarin man loa a pek a ngai a, a zau zawng hi acre 20 tal a ni tur a ni," a ti.

NK Chakma'n West Tuipui bial chhunga EMRS din ve theih a nih leh nih loh a zawh chungchangah K Beichhua chuan, Lungsen khuaah EMRS hmun tur thlan a ni tawh tih sawiin, Lungsen RD block-in West Tuipui bial chhunga khaw ṭhenkhat a huam thu a sawi a; chuvang chuan West Tuipui bial tan a hranpaa EMRS din tumna a awm loh thu a sawi.

Zawh belhnate chhangin SWD Minister chuan, Chawngte khuaa EMRS chu October 18, 2019-a sak zawh tura tih ni mahse sak zawh a la nih loh thu a sawi a, "Building la zo lo mah se, kumin aṭangin class ṭan tum a ni a, advertisement chhuah a ni tawh. Hna lak turah tualchhung mi duhsak a ni ang, tih a awm lo," a ti.

Dr K Beichhua chuan, Lawngtlai leh Tuipanga EMRS-te pawh October 18, 2019-a sak zawh tura tih a nih thu a sawi a; hmun dang pangaah EMRS din turin a hmunhma buaipui mek a nih thu a sawi bawk.