Zophaia IR camp sak chungchangah Bairabi NGO-in sorkar an ngaichâng
Bairabi All NGO chuan, Mizo IR police camp tur Zophaia ramri hrúla sak chungchangah Mizoram sorkar hmalakna an ngaichang dawn a, sorkar hmalak dan azirin an kal zel dan tur an rêl dawn.
Bairabia NGO hrang hrang hruaitute February 11, 2021 zana ṭhukhawm chuan, 'Zophai, Ramrilui bulah IR duty post sorkarin sa nghal se, kan police-te pawh darkar 24 tal duty nghal rawh se. Ramriluia Assam lamte'n lei an dawh hi kan sipaite'n ṭhiat nghal se kan ti. Duty post hi kan sorkarin naktuk February 12, 2021 ral hma ngeiin sa fel se, a fel thei lo a nih chuan, Bairabi ṭhalai rualte'n a sak hna February 13, hian hnatlang koh ni se,' an ti.
Hetih lai hian, sorkar thuneitute chuan February 12, Zirtawpni zan khan Kolasib DC Dr H Lalthlangliana hoin Bairabia tlawmngai pawl hruaitute an kâwm a, Zophaiah Mizo IR camp sak a nih tur thu an hrilh.
Dr H Lalthlangliana chuan, ramrî-ah sorkar thuneitu, a hmuna duty-te thu ngaihchàn thiam leh an thu zawm a pawimawh hmasak thu sawiin, "Ramria hmalaknaah ngaihtuahna fím tak nen ruahmanna kalpui a ṭul. Nakin huna ramri hauhna kawnga hmalakna ngêlnghet zawk a thlen theihna turin ngaihtuahna sèn tel a ngai," a ti a; Bairabi NGO-te ṭhahnemngaihna leh inpeknaah lawmthu a hrilh.
DIG (Northern Range) Lalhuliana Fanai chuan, eng pawh hmachhawn thei turin an inpeih nia sawiin, "Nunna thàp ngai a nih pawhin Mizo ṭhalaite an inhuam ang bawkin Mizoram police-te kan inhuam reng a ni," a ti a; an hna a nih angin police duty-te ring ngam turin Bairabi NGO hruaitute a ngen.
Awmze nei loa hmalaknain chhiatna duhawm loh zawk a thlen thei tih sawiin Lalhuliana Fanai chuan, "Awmze nei ruahmanna a awm theih nan ngun tak a ngaihtuahna sèn a ngai," a ti.
Sorkar thuchhuah tarlan danin, February 13, Inrinni khan sorkar leh Bairabi Joint VC ṭang dun hmalaknain Ramrilui thlenga lirthei lut thei turin kawng laih tlang a ni a; hmun ṭhenkhatah hume pipe phûm a ni.
Hetih lai hian, Inrinni chawhnu lam khan hume pipe phûm hna chu Assam police-te'n an chawlh lailâwktir a, a ṭul angin Assam lam official-te biak a nih hnuah Assam police-te chu an tawlhkir.
Vanglaini palai zawhna chhangin Bairabi Joint YMA hruaitute chuan, Mizo IR camp sak chungchangah sorkar an ngaihchàn dawn thu an sawi a, "Sorkarin IR camp hi sak a nih tur thu an sawi a, an hmalakna kan ngaichâng dawn. Hma an lâk loh chuan hmalak dan tur kan rél ang," an ti.
Tarlan tawh angin, Mizo IR-te chuan Zophaia buaina a awm avanga an duty-na hmun ramri bulah February 12, 2021 khan puan-in an kaih a, mahse, Mizoram sorkar thuneitu sang zawk aṭanga thu an hmuh avangin an ṭhiat leh nghal. Ramri bulah hian Assam police leh Mizoram police-te awm lo ve ve tura tih a ni.