KHAWTHLIR
Tuirialah mi pahnih an tla
February 12, Zirtawpni zan 6 khan Sunhluchhip khaw mi pahnih chu Tuirial luiah an tla a, nimin khan pakhat zawk ruang hmuh a ni.
Vanglaini thu dawn danin, mi pahnihte hi Sunhluchhip leh an khaw ṭhenawma mite'n an zawng a; nimin chawhnu dar 2 vel khan Thangzela (37) ruang hmuh a ni a, Thanglalduata (kum 18 vel) chu he thu ziah lai hian la zawn mek zel a ni.
Thisen pe
KṬP, Bethlehem Branch chuan an branch din champha vawi 56-na pualin February 13, Inrinni khan an Kohhran Hall-ah thisen pek an huaihawt a, Synod Hospital tan thisen unit 40 an pe a, a petute mipa 36 leh hmeichhia pali an ni.
Heroin man
Excise & Narcotics department leh Assam Rifles-te chuan February 13, Inrinni khan Hnahthialah heroin gram 667 an man a, a neitua puh Hrangkap (47) s/o Naumang, Bung khua, Myanmar nia inchhál pawh man nghalin, Inrinni khan Court-ah hruai a ni. Heroin an man hi tualchhunga hralhna ang chuan Rs. 3,00,15,000 man a ni.
Sava veh khap
Lawngtlai District Magistrate chuan thupek chhuahin, Lawngtlai district-ah silai hmanga ramsa leh sava veh khap a nih thu a puang. Thupek hi thla hnih chhung hman tur a ni a, thupek zâwm lote chu IPC Section 188 leh Wildlife Protection Act, 1972 Section 9 hmanga hrem theih a ni.
In kâng ral
February 13, Inrinni tlai khan Saikhamakawna Lalthlamuana in, Assam type chu a kâng a, bungrua chuh hman awm loin a kâng ral. Thu dawn danin, in hi chhâwng hnih a ni a, a chung zawkah Vanlalhriata te chhungkua an chêng a, a hnuaiah Vanlalruata a chêng thung. In kan ṭan lai hian in luahtute an awm lo a ni.
Compaign hun tàwp
February 16, naktuka Aizawl Municipal Corporation (AMC) inthlan tura campaign hun chu nimin tlai dar 4 khan a tàwp a; AMC inthlan tur atan campaign phal a ni tawh lo. Campaign tawp hun hi inthlan vote thlak hun tàwp (naktuk tlai dar 4) aṭanga chhiar leta darkar 48 (Pathianni tlai dar 4)-naah a ni.
ICU-ah mi 2 awm
State Referral Hospital-ah Inrinni khan Covid-19 vei mi pakhat dah luh a ni a, ani nen SRH-ah hian hripui vei vangin mi pali enkawl mek an ni. SRH-ZMC Bulletin tarlan danin, mi pali zinga pahnih chu ICU-ah awmin, ventilator hmanga enkawl ve ve an ni a; Isolation ward-a awm mi pahnihte'n harsatna lian tham an nei lo.