MLA-in vantlang inthiarna a hawng

Nimin khan Zoram Medical College (ZMC)-ah Swachh Bharat Mission (Grameen) hnuaia cheng nuai 30 sénga sak van­tlang inthiarna, community sanitary complex (CSC) pasarih chu Aizawl South-III bialtu MLA Prof. F Lalnunmawia'n a hawng.

Prof. F Lalnunmawia chuan, "Mizote hian sap ram ang maiin kan in chhungte kan tifai a, mahse, kan inthiar­na leh vantlang hmunte erawh kan tiṭawp thei hle," a ti a; thianghlimna lamah ṭan lak a pawimawh thu a sawi. MLA hian CSC sakna khaw paruka khawtlang hruaitute hnenah an khaw chhung ṭheuha CSC sak thar chabi leh thlalak a hlân a ni.

CSC sak chungchang sawi­tu PHE SDO Lian­tluanga Chohte chuan, Aizawl district chu páwn lama inthiar awm lohna, open defection free (ODF) district-ah puan a nih tawh thu leh Aizawl district-ah CSC 52 sak a nih tawh thu a sawi a; kum 2019-20 sorkar kum kal lai mekah CSC 28 sak mek a nih thu leh chu'ng zinga pasarih chu peih a nih tawh thu a sawi bawk.

CSC hi Aizawl South-III biala khaw pasarih - Falkawn, Phulpui, Lungsai, Ṭhiak, Sumsuih, Hmuifang leh Lunglengahte sak a ni a, hmun ṭhenkhatah chuan a enkawltute luah tur dawr siam nghal a ni. ZMC-a CSC an sakah chuan rualbanlote inthiarna tur bik siam tel a ni.

CSC hawnna inkhawmah hian ZMC director Prof. L Fimate pawhin thu a sawi a, CSC sakna khaw pasariha khawtlang hruaitu te, PHE department hotute leh ZMC hotute an tel.