COVID-19: Mizoram dinhmun Chhuahtir tawh zat 99.41%

Mizoramah Covid-19 vei February 12, Zirtawpni khan mi pakhat hmuh chhuah a ni a, February 13, Inrinni khan hmuh belh an awm lo. Hripui laka fihlim tawh Inrinnia chhuahtir an awm lo a, nimin khan mi pathum chhuahtir a ni a; hri kái hmuh tawh mi 4,392 zinga 4,366 (99.41%) an chhuak tawh. 

Covid-19 vei February 12-a hmuh belh chu Rapid Antigen Test hmanga Aizawla hmuh chhuah a ni a; Dinthar venga mipa kum 46, February 9-a Kolkata aṭanga haw, Covid-19 negative certificate a neih avanga Lengpui Airport-ah endik loh a nih hnuah, khawsik a neih avanga swab sample endik leh a ni.

Hripui laka fihlim tawh nimina chhuahtir mi pathum chu Durtlang BSUP CCC aṭanga chhuak­te an ni. Mizoramah Covid-19 vei mi 4,392 hmuh chhuah a ni tawh a, mipa 3,214 leh hmeichhia 1,178 an ni. Nimin tlai dar 5 thleng khan mi 4,366 (99.41%) chhuahtir an ni tawh a, mi pakua (0.20%) thi tawhin, enkawl mek mi 17 (0.39%) an awm. 

February 12, Zirtawpni khan ZMC laboratory-ah swab sample 41, TrueNAT-PCR hmangin district paliah sample 13 leh RAT hmangin district 11-ah sample 693 endik a ni a; sample endik zawng zawng chu 747 niin, chu'ng aṭanga Covid-19 positive hmuh chhuah pakhat chu 0.13% a ni. ZMC laboratory leh TrueNAT-PCR hmanga endik zingah hripui vei hmuh a ni lo.

Inrinni khan ZMC laboratory-ah sample 62, TrueNAT-PCR hmangin Lunglei leh Kolasib-ah sample pariat leh RAT hmangin district pangaah sample 415 endik a ni a; sample endik zawng zawng chu 485 niin, Covid-19 an awm lo a ni.

February 13, 2021 thlenga Mizorama swab sample endik tawh zat chu 2,20,482 a ni a, chu'ng aṭanga Covid-19 positive mi 4,392 chu 1.99% a ni. Hripui vei hmuh tawh zinga mi 2,081 chu Mizoram chhunga kái an ni a, mi 2,311 chu Mizoram páwn aṭanga an rawn luh hnua hmuh chhuah an ni thung.

Mizorama district 11 zinga district pariat - Siaha, Champhai, Kolasib, Serchhip, Mamit, Saitual, Khawzawl leh Hnahthial district-ahte Covid-19 vei an awm tawh rih lo. District pathum - Aizawl (14), Lunglei (3) leh Lawngtlai (3) district-ahte chiah hripui vei an awm rih a ni.