HTE Minister-in NIT hmun a tlawh

Higher & Technical Education (HTE) minister Dr R Lalthangliana chuan February 13, Inrinni khan Lengpui rama National Institute of Technology (NIT), Mizoram hmun leh West Phailenga a department enkawl hmunhmate a tlawh.

NIT, Mizoram campus hmun a tlawhnaah Dr R Lalthangliana chuan, NIT chu Chief Minister-in a ngai pawimawh nia sawiin, "Kum 10 chhung NIT, Mizoram hi baihvai takin a lo kal tawh a, thawktute ṭhahnemngaihna azarah temporary campus chu Aizawl hmun hrang hranga mi in luah chungin an kalpui a ni," a ti.

HTE Minister chuan, NIT chu Act of Parliament-in Institute of National Importance-ah a puan tawh avangin, Mizoram sorkarin rang taka tihpuitlin a nih theih nan hma a lâk thu a sawi a; hmalakna turte NIT hotute a sawipui nghal.

Health minister Dr R Lal­thang­liana hian Lengpui dam­dawi-in a tlawh nghal a; hmun­hma hung dan tur te, tui dah khâwlna lian zawk siam dan tur te, doctor, nurse leh thawktu dangte quarters sak dan turte a en a ni.

R Lalthangliana hian West Phaileng damdawi-in pawh tlawhin, doctor leh nurse quart­ers hmunhmate a enfiah a; thawktute'n laboratory technician an mamawh thu an sawi chu financial year thar nghah a ngaih tur thu a hrilh. A ṭula hman atan PHC-a thawktute chu Rs. 10,000 a pe bawk.

West Phailengah hian Labour, Employment & Skill Development Entrepreneuship (LESDE) quarters leh building 11 vel sak sa, chhawr ṭangkai loh a tlawh bawk a; ṭangkai zawka hman a nih theih nan Cabinet-ah thlen a tum thu a sawi.

Dr R Lalthangliana hian West Phaileng Higher Secondary School-a thawktute'n a ṭula an hman atan Rs. 10,000 a pe a; West Phaileng HSS chu lumpsum grant-in-aid zinga mi a nih angin, budget session zawh hnuah tihhmasawn dan tur ngaihtuah a nih tur thu a sawi bawk.