Ward committee kan din ngei dawn - ZPM

ZPM hruaitute chuan February 13, Inrinni khan an pisaah thuthar thehdarhtute an kâwm a; AMC-ah sorkarna an siam chuan ward committee an din ngei tur thu an sawi.

ZPM general secretary Lalmuanpuia Punte chuan, AMC hnuaiah ward committee an ngai pawimawh hle tih sawiin, "Sorkarna kan chan phawt chuan ward committee kan din ngei dawn. Party ṭhenkhat chuan ward committee sawi nêp zawngin thuchhuah an siam a, an sorkar a nih pawhin din an tum lo tihna a ni," a ti.

ZPM PAC member TBC Lalvenchhunga chuan, MNF adviser Lalruatkima'n 'In luahtute leh luahtirtute tan zalenna dár vuak a ni dawn' tiin a sawi tih tarlangin, "The Mizoram Urban Areas Rent Control Act hman thuai a nih tur thu a sawi hi keini ZPM chuan lawmawm kan ti tak zet," a ti a, mipui zirtira kalphung thar an puanzar rah nia an ngaih thu a sawi.

TBC Lalvenchhunga chuan, The Mizoram Urban Areas Rent Control Act hman lai chu kum 1974-a siam a nih thu sawiin, "Kum 50 dawn hnuah siam danglama mi harsate chanvo humhalh a, zahawmna humhalh a nih theihna turin MNF sorkar khan kum 2006-ah bill an pu lut a, a hlamzuih. Congress sorkarin kum 2017-ah an pu lut leh a, Select Committee kutah hlan a ni. Inthlan dawnah a hlamzuih leh a ni," a ti.

Lalmuanpuia Punte chuan, MNF sorkarin an term chanve an hman hnuah pawh The Mizoram Urban Areas Rent Control Act-ah hmalakna an nei lo tih sawiin, "AMC election tura an manifesto-ah pawh an dah lo. Inthlan dawn boruak sosang tawh takah hman a nih tur thu Minister-in a rawn sawi leh hi a lawmawm kan ti," a ti a; Mizoram Urban Areas Rent Control Bill 2017 tihhlawhtlin ngei an phût thu a sawi.