State sorkarin a duh duhin AMC a khawih danglam thei lo - Zodintluanga

Mizoram Pradesh Congress Committee (MPCC) hruaitute chuan Inrinni khan Aizawl Press Club-ah thuthar thehdarhtute an kâwm a; an treasurer Zodintluanga Ralte, MLA chuan, state sorkarin a duh duhin AMC a khawih danglam theih loh thu a sawi.

Zodintluanga Ralte chuan, sorkarna an siam laiin AMC nodal department UDPA kum 10 a enkawl thu sawiin, "AMC hi India danpuiin thuneihna sang tak a pe a, state sorkarin a duh duhin a khawih danglam thei lo. Kan sorkar lai pawhin sum tam tak sorkar laipui aṭangin an dawng ṭhin a, min mamawh a nih loh chuan AMC inrêlbàwl danah state sorkar kan va inrawlh ngai lo," a ti.

MPCC Treasurer chuan, AMC-in budget hranpa a neih thu sawiin, "Central Finance Commission aṭanga khawpui enkawlna tur sum dawng ṭhin a ni zawk tih kan hriat a ngai. Mipuite'n duh taka kan thlan tlin chu state sorkar hian ṭha takin a thawhpui mai tur a ni," a ti a, MNF-in state-a ruling ngei tia an au ṭhin chu invauna lem tak a nih thu a sawi.

Inthlan tur boruak thlirin ZPM-in tlinna tur ward an nei lo nia sawiin Zodintluanga chuan, "Tling chuang lo tur ZPM candidate vote hian AMC sum nasa taka ti chingpentu MNF tlinna chance a siam dawn a, chuvangin, Aizawl khawpui hmasawnna tura ruahmanna ṭha tak neitu, 'Kan ti ang' tih chu ti mai ṭhin Congress candidate-te vote vek turin Aizawl mipui kan ngen a ni," a ti.

Zodintluanga chuan, Ailawng leh Neihbawih (Sihphir)-a AMC ram leinaah cheng tam tak eirûkna a awm tih Congress-in an hâi chhuah hnuah pawh rorel lai MNF-in sawifiah ngaihna an hre lo tih sawiin, "Ngawihbopui an tum niin a lang. Ailawng ram neitu Pu Rochanmawia an sawifiahtirna leh Assembly leh RTI Act zawhna chhànna a inmil thei lo," a ti a; ram dahkham (mortgage) sa an lei chhan an sawifiah zawh loh thu a sawi.

MPCC Treasurer chuan, Solid Waste Management Centre, Tuirial an tlawh ṭumin MNF AMC sorkarin bawlhhlawh ṭawih thei leh ṭawih thei loah chiah an lo chhûng khawm tih an hmu a, mipui hriata an puanzar hnuah pawh MNF-in bawlhhlawh paih dan mipui tana him leh awlsam an tiam thei lo tih a sawi a, "AMC-ah sorkarna kan siam chuan ni nga chhungin bawlhhlawh paih dan tun aia ṭha zawkin kan siam ang," a ti.

Mizoram mipui chu Citizenship Amendment Act (CAA) barh luih an ni tawh tih sawiin Zodintluanga chuan, "Tunah hian scheduled tribe-te'n hnam tênau kan nih anga hamṭhatna kan dawn ṭhinte min chuhpuiin, Mizorama Hindu awmte minority-a dah a, an puala reservation siamna tur ruahmanna kalpui a ni," a ti a, ruahmanna thar chu BJP an thawhpui vanga CAB thláwptu MNF sorkarin a thlâwp a hlauhawm thu a sawi.

MPCC hruaitute chuan, Aizawl chu khawpui nuam, thianghlim leh hrisel, dan lalna, awlsam zawka eizawn theihna hmun, mi retheite thlamuanna, khawsak awlsamna leh zirna hmunpui ṭha zawka siam an tum thu a sawi a, "Hnehna kan chang a nih chuan AMC awmze nei, a tih tur hneh taka ti chat chat thei, eiruknaa fihlim si kan siam dawn a ni," a ti.