Lal Thanhawla chawimawina hlàn

All India Professionals Congress (AIPC), Mizoram Chapter chuan Mizoram Pradesh Congress Committee (MPCC) president Lal Thanhawla chu Mizoram tana tlawmngai páwl ṭangkai tak tak dintu a nih avangin February 13, Inrinni khan a inah chawimawina an hlân.

Lal Thanhawla chuan, kum 1967-a politics-a a luh hnuah politics tui nú a hriat ngai loh thu sawiin, "Ringtu tan politics hi rawngbawlna a ni. Politics-a kan programme hi Isua telna tlâk a ni tur a ni tih hi ka sawi dan leh pawm dan a ni. Congress-in remna leh muanna thupuiah a nei a, Isua programme nen a inmila ka hriat avanga zawm ka ni," a ti.

AIPC chairman Dr Henry Zodinliana chuan, Lal Thanhawla chu Mizo society-in vawiin thlenga a ṭangkaipui páwl hrang hrang dintute zinga mi a ni tih sawiin, ropui an tih thu a sawi a, "Politics-a Mizoram bung thar min kaipui piah lamah, kan society tana páwl ṭangkai min dinpuitu a ni hi a chhuanawm a ni," a ti a; chuvang chuan chawimawina pek a phù thu a sawi.

AIPC tarlan danin, Lal Thanhawla hi Mizoram Journalist Association, Mizoram Football Association, Mizoram Hockey Association, Mizoram Boxing Association, Aijal Amateur Athletic Club, Mizoram Olympic Association leh Aizawl Dramatic & Cultural Society-ah founder president leh secretary a ni.