MNF candidate vote turin mipui an sáwm

MNF senior vice president Tawnluia chuan February 13, Inrinni khan Aizawl Press Club-ah thuthar thehdarhtute a kâwm a; naktuka AMC inthlan turah MNF candidate-te vote turin Aizawl mipui a sáwm.

Tawnluia chuan, tun ṭuma AMC inthlan­ah Aizawl khawpui hmasawnna leh chang­kanna turin manifesto an buatsaih tih sawiin, "Kan thil tum hrang hrangte mipui tana tihlawhtling tur leh AMC sorkar rintlak leh ngêlnghet din turin MNF candidate-te duhsak taka min vote-pui ṭheuh turin Aizawl mipui kan sáwm a ni," a ti.

Khawpuia tualchhung inrêlbàwlna, Urban local body (ULB) kalphung leh thuneihna kenkawh danah India ram chu federal structure anga inkhaidiat mumal tak awm a ni tih sawiin Tawnluia chuan, "Central sorkar kutah eng emaw chen state-te kan awm ang hian, ULB/municipality enkawlna hi state sorkar kutah a awm a ni," a ti a; AMC pawh state sorkar enkawlna hnuaia awm a nih thu a sawi.

MNF Sr. Vice President chuan, municipality chu an thu thua kal loin, state nena inlungrual taka thawkho tur an nia sawiin, "Fund flow chungchangah leh policy duan thuah state sorkar pawmpui leh sate sorkar ruahmanna lo chuan a kal mai mai theih loh. An dan siam leh sum hmanna turte pawh state sorkar pawmpui phawt loh chuan ruahman theih a ni lo," a ti.

Khawpuia miretheite tana sorkar scheme-te leh hmasawnna hnathawh hrang hrangte ṭha taka kalpui a nih theih nan state sorkar leh AMC-te pheikhai rual taka a kal a pawimawh lo anga sawi an awm chuan thu dik lo an sawi tihna a nih tur thu Tawnluia chuan a sawi.

Tawnluia sawi danin, municipal/AMC-a thawktu lâk leh dah ngheh chungchangah state sorkar pawmpuina lâk a ngai. Sorkar kum kal mekah state sorkarin AMC tan grant-in-aid cheng nuai 1,100 a pe a; kuminah thawktu mi 50 a dah nghehsak a ni.

Tun ṭuma AMC inthlan turah bawlhhlawh sâwngbàwl dan leh paih danin sawi a hlawh tih sawiin Tawnluia chuan, mi ṭhenkhatin bawlhhlawh paih dan awlsam kan ngaihtuah ang an tih chu mipui hnena thu dik lo hrilhna a nih a hlauhawm thu a sawi.

MNF Sr. Vice Presi­dent sawi danin, envi­ronmentalist-te'n Supreme Court-ah PIL thehlutin, India rama bawlhhlawh sâwngbàwl dan tur ruahmanna siam turin an ngen a, Supreme Court chuan National Green Tribunal (NGT) a din a ni. NGT thu angin Environment Protection Act duan a ni a, chu Act hnuaiah chuan sorkar laipuiin Solid Waste Management Rules, 2016 a duang a ni.

Solid Waste Management Rules, 2016 angin in tinin bawlhhlawh an thliar hran chu tih ngei tur a nih thu sawiin Tawnluia chuan, "NGT hian min monitor reng a, dan kan zawm loh chuan development fund atana hman tur sum tam tak hi NGT hnenah fine angin kan pe ṭeuh dawn a, a vuak lêt chu na tak a ni ang," a ti.

Zawhna chhangin Tawnluia chuan, AMC inthlanah hian ward 19 awm zingah 15-ah chak ngei an inrin thu a sawi a ni.