Rua chungchanga hmachhawp a neihte CM Zoramthanga'n Union Minister a sawipui
Chief minister Zoramthanga chuan August 20, Thawhlehni khan Union Agriculture & Farmers Welfare leh Rural Development changtu minister Narendra Singh Tomar pawh hmuin, rua chungchanga a hmachhawpte a hrilh. Thawhlehni vek khan Union Road Transport and Highways minister Nitin Gadkari chu a pisaah a hmu a, Mizorama inkalpawhna kawngpui tihchangtlun dan tur a sawipui.
CM Zoramthanga chuan Union Agriculture & Farmers Welfare minister Narendra Singh Tomar chu ei leh bara Mizoram intodelhna atana hmalakna tur kawng hrang hrang leh rua hmanga hmasawnna chak zawka kalpui theih dan ruahmannate a sawipui a ni.
Sorkar thuchhuah tarlan danin, Zoramthanga chuan rua hmanga Mizoram mai ni lo, India hmarchhak bial pum leh ṭhenawm ramte thlenga an ṭhatpui theih dan tur te, chutiang atana a hmachhawpte leh hmalak dante a hrilh a; scheme awm sa aṭang mai ni loin, scheme thar, project thar leh special package hial pawh ruahman a ngaih tur thu a sawi.
Narendra Singh Tomar chuan, CM Zoramthanga ruahmanna a dawn hunah kimchang taka a lo zir chian tur thu leh theihtawp a chhuahpui tur thuin a lo chháng a; Prime Minister leh Finance Minister-te pawh sawipuiin, rawtna thlen se ṭhaa a rin thu a lo hrilh a ni.
Chief Minister chuan, ei leh bara Mizoram a intodelh theih nan Mizoram sorkarin chak taka hmalak a tum thu sawiin, chumi tur chuan sorkar laipui puihna an mamawh tur thu a hrilh a, Mizoram intodelhna tura hmalakna tur kawng hrang hrang a sawipui.
Union minister Narendra Singh Tomar chuan theihtawp a chhuahpui tur thu a sawi a, rawtna pawh a ṭul anga thlen ṭhin turin Zoramthanga hi a chah. Nitin Gadkari a hmuhnaah CM Zoramthanga chuan, Mizoramah fûr laiin ruahtui a tam avangin leimin, kawng tlahniam leh kawng chhia a awm ṭhin tih sawiin, kawngpuite chu uluk taka vil reng a ṭul thu leh hmun tam taka lei (bridge)-te chu thawm ṭhat leh thlak thuai a ṭul tawh thu a sawi a; Central Road Fund hnuaia Mizoramin sum a hmuh turte chu a rang lama pe thuai turin Nitin Gadkari a ngen a ni.
Road Transport and Highways minister Gadkari chuan, chief minister Zoramthanga thu thlente lo en zui a, tihhlawhtlin ngei a tum thu a sawi tih Mizoram sorkar thuchhuah chuan a tarlang. CM Zoramthanga hi State Planning Board vice chairman H Rammawi leh sorkar official dangte'n an ṭawiawm a ni.
CM leh Union Agri Minister Inkawmna
• CM-in rua hmanga Mizoram mai ni lo, hmar chhak pum leh ram ṭhenawmte thlengin an ṭhatpui theih dan tur a hrilh.
• Scheme awm sa atang mai ni lo scheme thar, project thar leh special package hial pawh ruahman a ngaih tur thu an sawi dun.
• Union Minister hian proposal a dawn hunah kimchang taka a lo zir chian tur thu leh theihtawp a chhuah sak tur thu a lo hrilh.