Police-in ruihhlo an hâl ral

Mizoram Police-te'n an ruihhlo man, chinfel tawhte chu nimin khan Aizawl Zoological Park, Sakawr­tuichhunah IGP (Law & Order) LH Shanliana hoin hâl ral a ni.

LH Shanliana chuan, Ministry of Home Affairs chhinchhiah danin, Mizoram chu khaw chhak lam aṭanga ruihhlo lo kalna kawng a nih thu sawiin, "Khaw chhak lam aṭanga ruihhlo tawlh rûk 80% chuan Mizoram a paltlang. Ruihhlo chi khat, methamphetamine hi mite'n ruih nan an hman tawh chuan pawi khawih duhna leh suahsual rawngbawl duhna a thlen ṭhin. Ruihhlo do tur hian mi zawng zawng kan ṭan rual a ngai," a ti a, ram leh hnam hmelma lian ber chu ruihhlo a nih thu a sawi.

Ruihhlo hâl ral takte hi methamphetamine kum 2018-a Special Narcotics PS-te'n an man, NDPS Act hnuaia thubuai siama chinfel tawhte a ni a; cheng nuai 200 hû hâl a ni.