MNF-in sorkar kalphung kalhin Mau a buaipui - Zodintluanga

Mizoram Pradesh Congress Committee (MPCC) treasurer leh Congress Legislature Party (CLP) leader Zodintluanga Ralte chuan, chief minister Zoramthanga leh MNF sorkarin mau/rua an buaipui mek dan chu sorkar kalphung kalh a nih thu a sawi.

Nimina Lal Thanhawla Auditorium-a MPCC-in Aizawl veng pathuma local council by-election thlir lâwkna leh infuihna hun an buatsaihah Zodintluanga chuan, "MNF sorkarin mau a buaipui mek dan hi sorkar kalphung kalh tlat a ni a, mimalin sorkar flagship programme an buaipui daih hian sorkar department-te an rin tâwk lohzia leh hlâwkna tèl tum ràna mau buaipui an nihzia a tilang chiang hle a ni," a ti.

MPCC Treasurer chuan, Lengte rama chief minister Zoramthanga huana mau chî kûi ṭiah chungchang sawiin, "Mau ṭha chi an buaipui mek hi kan ram intodelhna tur nge, Chief Minister intodelhna tur, tih hi ka zawhna a ni... Kum 1998-a sorkarna an siam tirhin Aii Puk scandal lian tak a awm nghal a, kum 2018-a sorkarna an siam aṭanga kum khat pawh a tlin hmain Lengte scandal a awm leh nghal bawk," a ti a; chutih laiin, Congress sorkar kum 10 chhungin MLA leh minister zingah sawisel kai an awm loh thu a sawi.

Zodintluanga chuan, CM Zoramthanga'n inthlan hmain SEDP chu chhungkaw tina cheng nuai thum semna tur a nih thu a sawi ṭhin laiin, tunah erawh chuan pawisa sem tur a nih loh thu a sawi leh daih tawh tih a sawi a, "Mipui tana rintlak an nih lohzia a chiang nghal hle a ni," a ti. CM ni mek Zoramthanga'n CM hlui Lal Thanhawla a chawimawi ṭan mek niin a sawi bawk.

CLP Leader chuan, Congress party chu an tla zawi viau dawn emaw an tih laiin, an phûr tulh tulh zawk nia sawiin, "Inthlan hmasa bera sorkarna siam leh nghal thei turin headquarters-a bul ṭanin kan insiamṭha chho leh mek a ni," a ti a; Congress sorkar chhunga LC-te lungawi lohnaah a mawhphurtu a nih thu sawiin, ngaihdam a dil nghal a ni.