PM thurawn petute'n sorkar hotute an kâwm

India ram economy dinhmun leh hmasawnna tura Prime Minister thurâwn pe tura din, Economic Advisory Council to the Prime Minister (EAC-PM) member secretary Ratan P Watal leh adviser Rajeswara Rao te chuan Mizoram an rawn tlawh a; nimin khan Aijal Club-ah Mizoram sorkar hotute nen Mizoram economy hmasawnna tura hmalak dan tur an sawiho.

Meeting-ah hian Mizoram chief secretary mawhphurhna la mektu Ashish Kundra chuan, Mizoram ei leh bar dinhmun leh eizawnna lama dinhmun tlangpui a tarlang a; India ram hmasawnna atana Mizoram ṭangkai theih dan te, Mizorama thar leh siam chhuahte hralh chhuahna atana tih tur pawimawh te, inkalpawhna kawng ṭha mamawh dante a sawi.

Ashish Kundra thil sawi te, tui leh kawlphethaa Mizoram intodelh theih nana hmalak dan tur te, Look East Policy tihhlawhtlin dan turte leh thil pawimawh chi hrang hrang sawiho a ni. 

Ratan P Watal chuan, chak zawk­a Mizoram ṭhan dan tur ngaihtuah an ngaih pawimawh rualin, India hmarchhak pumpui ṭhan dan nen an thlir kawp a ngaih thu a sawi a, "Mizoram hi ram zím tê, mihring tlemna a nih rualin, India ram nen khaikhinin hna thawk thei youh population a sang hle. Hei hi a nihna tura chhawr ṭangkai a nih phawt chuan hmasawnna hna thawhin awmzia a nei thui dawn a ni," a ti.

Tun dinhmuna Mizoram tana pawimawh ber pakhat chu inkal pawhna - kawngpui, tui kawng, boruak leh rél kawngte tihchang­tlun a nih thu sawiin Watal chuan, "Internet connectivity tihchangtlun pawh a pawimawh hmasa hle a ni," a ti. Mizoramah kum kal ta chhunga ramngaw tihchhiat zat percentage a sang chu vei a ṭul thu te, Mizoramin tourism project hrang hrang a ruahmante kalpui dan a fuh loh chuan kum 10 lek chhungin hluihlâwn thilah a chan theih thute a sawi bawk.

Rajeswara Rao pawhin, Mizoram chu hmasawn tura theihna leh mamawh nei ṭha nia a hriat thu a sawi a; EAC-PM chu thutlukna siamtu a ni lo a, Prime Minister hnena thurâwn petu a nih thu leh, sawihona aṭangin Mizoram leh India hmarchhak mamawhte an chhinchhiah thu a sawi a ni.