KHAWTHLIR

Delhi Mizo Zirlai Pawl hruaitute chuan August 20, Thawhlehni khan Delhi Mizoram House, Chanakyapuri-ah chief minister Zoramthanga an hmu a; India danpui 8th Schedule-ah Mizo ṭawng telh a nih ngei theih nana hma la turin an ngen. DMZP ngenna chu a bawhzui tur thu CM Zoramthanga chuan a sawi a; DMZP hnenah Rs. 20,000 a pe nghal a ni.

Mizoram Law College NSS unit leh Red Ribbon Club chuan August 25 -a an college din champha pualin nimin khan blood donation camp huaihawt­in, Aizawl Civil Hospital tan thisen unit 53 an pe a, a petute mipa 35 leh hmeichhia 18 an ni.

Kolasib DC Zoengsanga chuan nimin khan Kolasib Press Club a tlawh a, Kolasib MJA member-te nen an inkâwm. District Bawrhsap hian sorkar hmalakna hrang hrangah chanchinbumite ṭawiawmna an hmuh ṭhin avanga a lawmthu a sawi a; Kolasib Press Club-a hman turin computer pakhat a pe.

Minister of state Dr K Beichhua chuan August 20, Thawhlehni khan Don Bosco School, Siahaa Atal Tinkering Laboratory leh MSS Computer Laboratory a hawng. 

Nimin khan Chanmari YMA Hall-ah  Zoram Thar president Rev. Dr Zaichhawna Hlawndo lehkhabu ziah 'Tu Dang Kan Nilo Zofate kan ni' tih chu Rev. Vanlalbela'n a tlangzarh. Khuallian UN representative Joshua Cooper chuan, "Nangmahni chanchin ziahna bu tlangzarh hi tualṭomite chanvo indegenous people rights in nihna leh in chanvo dik tak in channa tura rahbi pawimawh tak a ni," a ti.

Champhai District Disaster Management Committee chu nimin kan DC pisa conference hall-ah additional DC Alexander V Chongthu hoin an ṭhukhawm a, 1st Bn. National Disaster Response Force (NDRF)-in chhiatrupna thlen thulha chêt lâk dan tur zirhona August 26 - Sept 1, 2019 chhunga Champhaia hun an hman tur chungchang an thlirho.