Swachh Survekshan Grameen 2019 hawng

Deputy chief minister Tawnluia, PHE department enkawltu chuan faina leh thiang­hlimna kawng­a thingtlang khuate inelna tur Swachh Survekshan Grameen 2019 chu nimin khan a pisaah a hawng.

Tawnluia chuan, Mizoramah nasa takin faina leh thiang­hlimna kawngah hmasawnna a awm tih sawiin, lawmawm a tih thu a sawi a, "PHE department leh UDPA department-te chu Swachh Bharat, Clean India programme kengkawhtu, mipui zirtirtu an ni mai a, a taka tihlawhtling thei chu khawtlang, pawl, chhungkua leh mimalte an ni a, faina leh thianghlimna kawngah mawhphurhna kan nei vek tih kan hriat a ngai," a ti.

PHE Minister chuan, faina leh thiang­hlimna kawngah Mizorama tlawmngai pawl hrang hrangte'n an thawh hlâwk hle tih a sawi a; Swachh Survekshan Grameen 2019 a hlawhtlin a, Mizoram chu ram fai leh thiang­hlim, mipui hriselna ram a nih theih nan sorkar programme-te chu ṭha taka ṭawiawm turin mipui a sáwm.

India sorkar chuan kum 2014 aṭangin faina leh thianghlimna lama hma lakna tur scheme, Swachh Bharat Mission a kalpui a, ṭhuang hnih - thingtlang leh khawpuiah ṭhen a ni. Thingtlang lama hmalakna chu PHE department-in a enkawl a, khawpui lama hmalakna chu UDPA department-in an enkawl thung.

'Swachh Survekshan Grameen 2019' hi Ministry of Jal Shakti, Department of Drinking Water & Sanitation buatsaih a ni a, faina kawnga state leh district-te thawh ṭhat dan hre turin tehna thuhmun hmangin teh a ni dawn a, endiktu atan IPSOS Research thlan a ni. Mizoram aṭang chuan khua 176 endik tur a thlan a ni a, district endik tur atan Siaha district thlan a ni bawk.

Swachh Survekshan Grameen 2019 hi August 14, 2019 khan New Delhi-ah Mi­nistry of Jal Shakti minister Gajendra Singh Shekhawat chuan India ram pum atan a lo hawng tawh a ni.