Tlabung lamah teak tum 800 vel man

Environment, Forests & Climate Change (EFCC)-a Tlabung Forest Range staff-te chuan, tunlai hian Khaw­thlangtuipui dung leh a chheh­vela teak thing, dan loa kih leh tawlhte vaiin beihpui an thlâk a; August 20, Thawhlehni thleng khan teak thing tum 800 vel an man tawh.

Sorkar thuchhuah tarlan dan­in, teak tawlh rûk mante chu Bangladesh ram lama tawlh luh tur nia hriat a ni a; an tawlhna Khawthlangtuipui lui dung aṭangin khawmualah lak chhuah mek zel niin, nimin thleng khan teak tum 600 vel an la chhuak tawh a ni.

Tlabunga DFO Lalbiak­chama Chawngthu chuan, EFCC department-in field staff indaih lohna chungchanga harsatna a tawh mek angin, Tlabung Division-ah pawh thawktu indaih lohna chu an harsatna a nih thu a sawi a, chuvang chuan Khawthlangtuipui dunga teak tawlhrukte hneh taka venhim a harsat ṭhin thu a sawi.

Tlabung DFO tarlan danin, teak thing tawlh rûkte chu fûr ruahtui tam lai leh tui len laiin a tam a, thing tumte chu zanah tui lian lentirin, lui mawng lam leh Bangladesh ram hnaihah an lo châng leh a, a tawlhtu leh chângtute'n an man kim vek thei bik lo. Teak tum an mante zinga a tam zawk chu a neitu hriat loh a ni.

Kum thum leh a chanve kal ta chhung khan Tlabung Forest Division chuan teak tum leh mau vawi 82 an man a, teak tum an man zawng zawng chu tum 8,000 chuang a ni. Motor vawi 21, lawng (boat) vawi 27 leh smuggler mi 24 an man tawh bawk.

An thil man aṭanga sorkara sum an chhûn luh tawh zawng zawng chu cheng nuai 47 vel a ni a; teak tum man sa Court-a thubuai inchiah mek leh lilâm tur tum 3,000 vel Tlabung Forest Complex-ah a awm mek bawk.