Hmasawn turin thawhho ṭhat a ngai - TJ Lalnuntluanga

Minister of state TJ Lalnuntluanga chuan nimin khan a bial, Champhai South constituency chhunga Champhai khawpuia Kanan Veng, Dinthar Veng leh Champhai Vengthar-te a tlawh a; khawtlang hruaitute nen an inkawmnaah, mipui aiawha thlan ram hruaitu, sorkar hnathawk leh mipuite an thawhho ṭhat chuan, hmasawnna kawng duhawm leh dik a awm thei dawn tih a sawi.

TJ Lalnuntluanga chuan, a bial mipuite chu hna thawh tak tak duhna rilru pu tura fuihin, "Khawtlang mamawhte sawiho hmasak phawt hnuah a ṭul anga thuneitute dawr ṭhin a finthlak a, rualkhai taka hmasawnna bial chhunga a awm theihna turin inràwnkhawm a, official-te thawhpui ṭhin a ngai a ni," a ti.

Minister chuan, "Mipui aiawha thlan ram hruaitute, thiamna, remhriatna leh tawnhriat tam tak nei sorkar official leh mipuite kan thawhho ṭhat phawt chuan ramin hmasawnna duhawm leh kawng dik tak a zawh thei dawn a ni," a ti a; rilru put­hmang dika hmasawnna chu hmasawnna hma­hruai a nih a ngai a, chumi hnuah hmasawnna dangteah kawng dik tak zawh theih a ni tih a sawi.

TJ Lalnuntluang­a chuan, tun hnaia thar­thawh Champhai Town Plan leh Seling-Champhai kawng double lane-a zauh tuma hmalaknate pawh tih tak takna nena bawhzui a nih hnuah peih theih tura beisei a nih thu a sawi a; a bial mipui tan Aizawl­a pisa dawr tura kal a harsat avangin a bial mipuite'n an mamawhte a hnena an thlen theih nan ruahmanna a siam tih a sawi bawk.

Minister hian Champhai Dinthar P/S, M/S leh khelmual te, New Champhaia Pinehill Adventist Academy leh Vengthar khaw chhung inkalpawhnaa harsatnate a hmunah a enfiah a ni.