District thar pathuma damdawi-inte District hospital-ah puan a ni tawh

Health & Family Welfare minister Dr R Lalthangliana chuan opposition group leader Lalduhoma zawhna chhangin, Serchhip District Hospital sak ṭhat tum a ni a, chuta tan chuan sum hmuh a nih theih nan concept paper/detailed project report siamin dilna thehluh a nih thu leh, district thar pathuma damdawi-inte chu district hospital-ah puan a nih tawh thu House a hrilh.

Lalduhoma chuan, Serchhip chu kum 30 vel chhung chief minister bial a ni chungin, District Hospital building chu a chhe tawh hle tih a sawi a; damdawi-in chak zawka sak a nih theih nan bawhzui theih a nih leh nih loh leh, Serchhip District Hospital-ah surgeon a rang thei ang bera dah theih a nih leh nih loh a zâwt a ni.

Dr R Lalthangliana chuan, Serchhip District Hospital (Jawaharlal Nehru Hospital) chu Mizorama district hospital zinga building chhe ber pawl a nih thu sawiin, "Building sak ṭhat a nih theih nan theihtawp kan chhuah dawn a, hma kan la mek a ni. Project kan siama sum ruahman pawh a tam tham viau. Khum 100 awm theihna tura ruahman a ni," a ti.

Health Minister chuan, district thar pathum - Saitual, Khawzawl leh Hnahthiala damdawi-inte chu district hospital dinhmuna hlân kai a nih tawh thu sawiin, "Kumin February 14 khan notification chhuah a ni," a ti a; district hospital a nih dawn avangin post thar eng emaw zat siam belh a nih dawn thu a sawi.

HFW Minister chuan, doctor indaih lohna a la awm reng thu sawiin, "Kan doctor ṭha tak takte'n ZMC-ah an dil a, an lut zel a, chuvang chuan harsatna a awm phah a ni," a ti a; chutih rualin, MPSC kaltlangin doctor tlem azawng lak thar tum a nih thu a sawi bawk.