Kuhva leh leiṭha dahna kudam kalhsakte Thiar chhuahna hun pek an ni

Tarlan tawh angin, Kolasib DC Zoengsanga hoin Kolasib SP Vanlalfaka Ralte, DAO J Rothanga leh sorkar official dangte chuan August 20 khan Kolasib leh Bairabi inkara dan loa sak kudamte an enfiah. Kudamahte chuan Myanmar lam aṭanga state páwna hralh tur kuhva leh phai lam aṭanga Champhai kaltlanga Myanmar lama phurh luh tur leiṭha (urea)-te dah a ni a, inthleng tawnna atana hman ṭhin a ni.

Kudamte hi dan loa sak a nih avang leh kudama an dah kuhva leh leiṭhate pawh phalna awm loa sumdawnna a nih avangin Kolasib DC thupekin kudam paruk chu kalh a ni. August 21-ah Vairengte SDO(C) leh Vairengte SDPO-te kaihhruainain kudam endik nawn leh a ni a, hemi ṭum hian kudam pakua an kalh leh bawk.

Dan loa sumdawnna bungrua dahna atana kudam hman zing­ah hian Food, Civil Supply & Consumer Affairs (FCSCA) kudam pawh pathum a tel a, sorkar kudamte erawh chu kalh a ni ve lo. Dan loa sumdawnna bungrua buaipui ṭhinte'n Kolasib DC leh official dangte hnena an sawi danin, an bungraw phurh tlang theihna atan Vairengtea Taxation depart­ment mi leh sate hnenah truck trip khatah Rs. 3,000 an pe ṭhin a, Selinga Customs duty lama pawisa an chawi ṭhin chu Champhai lamin an tifel vek a, truck trip khatah Rs. 8,000 vel an chawi a ni. Ni khatah truck trip 50 - 150 vel a kal ṭhin.

Vanglaini palai zawhna chhangin FCSCA department hotute chuan, FCSCA kudam chu agreement fel tak neiin dan ang thlapa mimal an luah tir thu an sawi a, "Hetianga dan loa sumdawnna bungrua dahna atana hman a nih takah chuan kan agreement-te kan en fel leh ang," an ti a; agreement chu August 26, 2019-ah zir chiangin, a ṭul anga hman a nih tur thu an sawi.

Kolasib Bawrhsap chuan August 22, Ningani khan order chhuahin, dan loa sumdawnna chuan khawtlang nun kawng tam takin a tihbuai thu a tarlang a, "Chinfel a ngai hle tih hriat a ni. Heng bungrua kuhva leh fertilizer-te lehkha chhuah aṭanga kar khat chhunga senghawi vek tur a ni. Tun hnuah chuan sumdawnna fel tak leh document fel tak nen lo chuan dah phal a ni tawh lo," a ti.

Vanglaini palai zawhna chhangin Kolasib DC chuan, bungraw tam tak kudama kalh khum ngawt chu a him lohna chin a awm theih thu sawiin, "A tam tham si a, senghawi dawnin a dahna hmun ringawt pawh a buaithlak. Tuin emaw lo hâlin emaw, lo khawih chingpen se, kan  mawhphurhna a ni dawn a, uluk taka thil ngaihtuah a ngai," a ti a; chawlhkar khat hnua bungraw lak chhuah loh chu an man tur thu a sawi.

Kolasib DC Zoeng-sanga chuan, kuhva rah chu ramria insumdawn tawnna thil a nih thu sawiin, "Tumahin licence an nei pawhin ka ring lo. Leiṭha chu a supply turin sorkarin approved dealer an nei a, anni lo chuan an supply ngawt thei lo. Document fel tak an nei a nih loh chuan kudamah hian kuhva leh leiṭhate dah kan phal tawh dawn lo," a ti.

Sorkar laipui chuan kudam sakna atan dan a neih thu sawiin, "He dan hnuaiah hi chuan a duh duh tan an ram pawh ni se, kudam sak theih a ni lo," a ti a; dan chu Mizoramah lak luh (adopt) a nih loh avangin harsatna an tawh thu a sawi.

Kudam enfiahnaa kal Kolasib chanchinbu Zingṭian editor Zomuanpuia Tlau hnen aṭanga thu dawn danin, kudamte chu ram neitute'n an ta angin sawi mah se, chhui chianna aṭanga a lan dan chuan, hnam dangin Mizo tho kaltlangin eng emaw zat an leisak a ni. Ṭhenkhat chu Mizoin man chawiin hnam dang an luahtir a ni thung.

Kudam ṭhenkhat chu Champhai lam mite ta a ni a, Champhai aṭanga kudama dah tur kuhva buaipui leh state páwn aṭanga leiṭha phurh luh lo buaipuitu berte chu hnam dang deuh vek an ni.